Վրաստանի անջատական երկրամասի փաստացի նախագահ Ռաուլ Խաջիմբայի հրաժարականի պահանջով այսօր հարյուրավոր ցուցարարներ ներխուժել են նախագահական նստավայրի զինանոց և առգրավել զենքեր։ Այս մասին հայտարարել է Աբխազիայի Անվտանգության խորհրդի նախագահ Մուհամեդ Կիլբը:
Տեղից ստացվող լուրերի համաձայն՝ ոստիկանությունը փորձում է կանխել ընդդիմության և գործող իշխանությունների միջև հնարավոր բախումները:
Այս իրադարձությունների նախօրեին Աբխազիայի խորհրդարանը արտահերթ նիստի ընթացքում փաստաթուղթ է ընդունել՝ կոչ անելով Խաջիմբային ինքնակամ հրաժարական տալ՝ «հետագա ապակայունացումից խուսափելու համար»:
Ներքաղաքական իրավիճակն այդ երկրամասում կտրուկ սրվել է երեկ, երբ մայրաքաղաք Սուխումիում ցուցարարները ներխուժել են նախագահական նստավայր` կոտրելով շենքի առաջին հարկի գրեթե բոլոր ապակիները՝ «Խաջիմբա, հեռացի՛ր» վանկարկումներով:
Մինչ այդ ցուցարարները հավաքվել էին չճանաչված հանրապետության Գերագույն դատարանի շենքի մոտ, որտեղ պետք է քննարկվեր նախագահության ընդդիմադիր թեկնածու Ալխաս Կվիցինիայի հայցը, որով նա բողոքարկել է անցյալ տարվա սեպտեմբերի ընտրություններում Խաջիմբային հաղթող ճանաչելու՝ առաջին ատյանի դատարանի որոշումը:
-
-
