Մեզ վստահված սահմանի ամբողջ երկայնքով կատարվել են այնպիսի հսկայածավալ ինժեներական, ամրաշինական աշխատանքներ, ինչի շնորհիվ մենք թշնամու նկատմամբ ձեռք ենք բերել դիրքային գերակայություն.
Զորամասի հրամանատար, գնդապետ Երվանդ Գալստյանը նոր մարդ չէ բանակում: Նա Մոնթե Մելքոնյանի անվան ռազմամարզական վարժարանի առաջին շրջանավարտներից է: Այն ավարտելուց հետո ստացել է լեյտենանտի ուսադիրները և… անցել զինվորականի տպավորիչ ճանապարհ՝ դասակի հրամանատարից մինչև լեռնահրաձգային գնդի հրամանատար: Անցած տարիների ծառայությունը ամենևին էլ հեշտ ու դյուրին չի եղել: Ինչպես ինքն է ասում` զինվորականի ուղին ոչ մի ժամանակներում էլ անխութ չի լինում: Եվ նա որտեղ էլ որ ծառայել է, ծառայել է անմնացորդ նվիրումով:
Չորս ամիս առաջ է նրան վստահվել այս զորամասի հրամանատարի բարձր և անչափ պատասխանատու պաշտոնը:
-Պարոն գնդապետ, շտաբի պետ, փոխգնդապետ Արմեն Գասպարյանի հետ զրույցից տեղեկացանք, որ պայմանագրային ծառայության անցնելու նպատակով զորամասի հրամանատարությունը բազմաթիվ դիմումներ է ստանում: Փաստորեն, ծառայության այս տեսակը սկսել է գրավել ժամկետային ծառայությունն ավարտած շատ ու շատ երիտասարդների: Ըստ Ձեզ` ինչո՞վ է սա պայմանավորված:
-Առաջին հերթին՝ մեր երիտասարդների հայրենասիրությամբ ու հայրենապաշտությամբ, ինչն անժխտելի է և վճռորոշ գործոն է: Ծառայության համար ստեղծված լավ պայմաններով: Ինչ նկատի ունեմ լավ պայմաններ ասելով. նախ՝ բարձր ու կայուն աշխատավարձը, որը, կարծեմ, ավելի կբարձրանա, բազմատեսակ ու բարձր կալորիականություն պարունակող սնունդը և որակյալ հանդերձանքը, որ տարեցտարի ավելի է թարմացվում և որակապես կատարելագործվում: Սրանք են այն հիմնական խթանիչները, որ մեր երիտասարդներին բերում են բանակ: Միայն այս տարի չորս տասնյակից ավելի երիտասարդներ են անցել պայմանագրային ծառայության, և մոտ երեք տասնյակին էլ միջնորդագրեր ենք տվել: Քիչ առաջ ես զրույց ունեցա չորս երիտասարդների հետ. երկուսը եղբայրներ են՝ Վարդենիսից, մեկը տանկիստ է, մյուսը՝ մոտոհրաձիգ, իսկ մյուս երկուսը մասնագիտությամբ մոտոհրաձիգ ու կապավոր են: Տղաները լավ տպավորություն թողեցին նախևառաջ իրենց մասնագիտական գիտելիքների պաշարով: Այդ կարծիքին են նաև իմ տեղակալները, ովքեր զրուցել են նրանց հետ: Քիչ չեն նաև արտերկրից եկողները: Իմիջիայլոց, մեր կողմերում էապես նվազել է արտագնա աշխատանքի գնացողների թիվը հենց պայմանագրային ծառայության շնորհիվ:
-Ի դեպ, առաջնագծում մարտական հերթապահություն իրականացնող տղաների հետ էլ այս հարցերի շուրջ անմիջական զրույց ծավալվեց, և նրանք էլ նշեցին, որ շատ բան է փոխվել դեպի լավը: Հերթափոխը մեկ ամիս դիրքերում է, երկու ամիս՝ տանը… Աշխատավարձից էլ դժգոհ չէին: Կատակով ասում էին, որ եթե հետագայում էլ աշխատավարձը բարձրանա, օտարության մեջ էլ հայ չի մնա…
-Տեսե՛ք, հերթափոխը մեկ ամիս մարտական դիրքերում է, ինչի համար ստանում է համապատասխան աշխատավարձ, երկու ամիս գնում է տուն, իր բան ու գործին, էլի ստանում է իր հասանելիք աշխատավարձը, բայց ոչ մարտականի չափով: Ուտելու հետ կապված խնդիր չկա: Սնվում են՝ ինչպես տանը: Լեռնային պայմաններում ծառայություն իրականացնելիս համազգեստն էլ կմաշվի, կպատռվի: Առանց դրա հնարավոր էլ չէ: Մի խոսքով` հանդերձանքի հետ էլ կապված զորքը խնդիր չունի առհասարակ:
-Պարոն հրամանատար, սահմանի այս բավականին բարդ ու դժվարին հատվածի պահպանությունն ու պաշտպանությունը, որ ծանրացած է պայմանագրայինների ուսերին, դժվար կլիներ պատշաճորեն իրականացնել, եթե ինժեներական առումով այն չլիներ լավ կահավորված:
-Մեզ վստահված սահմանի ամբողջ երկայնքով կատարվել են այնպիսի հսկայածավալ ինժեներական, ամրաշինական աշխատանքներ, ինչի շնորհիվ մենք թշնամու նկատմամբ ձեռք ենք բերել դիրքային գերակայություն: Սահմանագծի ամբողջ երկայնքով փորված են ապահով խրամուղիներ, կառուցված են ամուր ու հուսալի խրամաբջիջներ, կրակակետեր, ռմբապաստարաններ, անանցանելի արգելափակոցներ: Մենք երբեք ձեռքներս ծալած չենք նստում: Առաջնագծում անընդհատ աշխատանքներ ենք կատարում, կատարելագործում պաշտպանությունից հարձակման անցնելու մեր գործիքակազմը: Առաջնագիծն ապահովված է նաև գերժամանակակից տեսադիտարկման սարքերով:
-Իսկ ռազմական տեխնիկայի՞, զինատեսակների՞ առումով…
-Մարտական հերթապահություն իրականացնող մեր ստորաբաժանումները զինված են ինչպես հարկն է՝ ամենաարդիական զինատեսակներով: Չեմ ուզում փակագծերը բացել: Իսկ մեր հրետանային մարտկոցներն անհրաժեշտության դեպքում ի զորու են այնպիսի խորտակիչ հարված հասցնելու, որ թշնամու տարածքում քարը քարի վրա չի մնա: Այս լեռների տերը մենք ենք: Մենք ենք ու մեր լեռները: Դուք եղաք առաջնագծում, տեսաք, թե ինչ տղերք են կանգնած դիրքերում: Առյուծ տղերք են, ոգով ուժեղ, քաջակորով, վտանգի առաջ աչք չթարթող…
Չմոռանամ նշել, որ բոլորովին նոր «Ուրալներ», «Ուազներ» ենք ստացել… Թարմացվել է նաև զորամասի ավտոպարկը:
-Օրերս Ձեր հրամանատարությամբ ծառայող տասնյակ սպաներ ապահովվեցին նոր բնակարաններով: Ես անձամբ եղա նրանց համար կառուցված շենքում և չեմ կարող հիացմունքս թաքցնել…
-Հունվարի 28-ը՝ Հայկական բանակի ստեղծման օրը, մեր զորամասի երկու տասնյակ սպաների համար կրկնակի տոնի վերածվեց. նրանց պաշտպանության նախարար Դավիթ Տոնոյանը և զորամիավորման հրամանատար, գնդապետ Արայիկ Հարությունյանը ծառայողական բնակարանների վկայագրեր տվեցին: Չեմ կարող չնշել շինարարների սրտացավ ու նվիրված աշխատանքը, քանզի նրանք սահմանված ժամկետում կարողացան կառուցել շինարարական բոլոր չափանիշներին համապատասխան, ամուր և որակյալ շենք՝ իր բոլոր հարմարություններով:
ՍԱՄՎԵԼ ՀԱՐՈՒԹՅՈՒՆՅԱՆ
Լուս.՝ ԱՐԵԳ ՎԱՐԴԱՆՅԱՆԻ
Մեզ վստահված սահմանի ամբողջ երկայնքով կատարվել են այնպիսի հսկայածավալ ինժեներական, ամրաշինական աշխատանքներ, ինչի շնորհիվ մենք թշնամու նկատմամբ ձեռք ենք բերել դիրքային գերակայություն.Երվանդ Գալստյան
Опубликовано ՀՀ պաշտպանության նախարարություն / MoD of the Republic of Armenia Пятница, 7 февраля 2020 г.
