Արարատ լեռան հիշատակման պատճառով. Թուրքիան Չինաստանից պաշտոնական բացատրություն է պահանջում
Թուրքիան Չինաստանի իշխանություններից պաշտոնական բացատրություն է պահանջում Հայաստան ուղարկված հումանիտար օգնության տուփերի վրա գրառման կապակցությամբ:
Կորոնավիրուսի համաճարակի դեմ պայքարի շրջանակներում Չինաստանը Հայաստան էր ուղարկել մեծաքանակ բժշկական պարագաներ, այդ տուփերի վրա չինական կողմը հետևյալ գրառումն էր արել. «Թող մեր բարեկամությունն ավելի բարձր լինի, քան Արարատ լեռը, և ավելի երկար, քան Յանցզի գետը»։
Պաշտոնական Անկարայի զայրույթի պատճառը Արարատ լեռան հիշատակումն է, որը թուրքական կողմը անվանում է Աղրի լեռ: Թուրքական պետական «Անադոլու» լրատվական գործակալության փոխանցմամբ` երկրի դիվանագիտական գերատեսչությունը դիմել է Անկարայում Չինաստանի դեսպանին և Չինաստանի արտգործնախարարությանը «պահանջելով պարզաբանել տուփերի վրա արված գրառման պատճառը»:
Ըստ Թուրքիայի արտգործնախարարության՝ դեսպանն ասել է, որ Հայաստան ուղարկված օգնությունը պատրաստվել է կառավարության կողմից և Երևան ուղարկվել մասնավոր ընկերության միջոցով։ Ի սկզբանե տուփերի վրա եղել է միայն չինարեն գրառում, իսկ անգլերեն գրառումը հետո է ավելացվել: Դեսպանի խոսքով Չինաստանը հարգում է Թուրքիայի ինքնիշխանությունը և տարծաքային ամբողջականությունը եւ հավելել է, որ ծառայողական քննություն է սկսվել, որի արդյունքների մասին կհայտնեն թուրքական իշխանություններին:
auroranews.am
-
-
