Սենատոր Մենենդեսի ուղերձը Հայոց ցեղասպանության 105-րդ տարելիցի կապակցությամբ

Menendes

 Սենատոր Բոբ Մենենդեսը, որը Սենատի արտաքին հարաբերությունների հանձնաժողովի անդամ է, այսօր տեսաուղերձ է հղել՝ ի հիշատակ Հայոց ցեղասպանության 105-րդ տարելիցի:

«Ինձ համար մեծ պատիվ է միանալ բոլորին Նյու Ջերսիում և ամբողջ աշխարհում, որոնք հիշատակում են Հայոց ցեղասպանության 105-րդ տարելիցը: Ես հպարտ եմ, որ ղեկավարել եմ Հայոց ցեղասպանության փաստերը հաստատող բանաձևը, և հատկապես հպարտ եմ, որ անցյալ տարի դեկտեմբերին, երկար տարիների աշխատանքից հետո, Սենատում բանաձևն ընդունվեց միաձայն: Այդ պատմական իրադարձությունը երբեք տեղի չէր ունենա առանց ամերիկահայ համայնքի աջակցության և նվիրվածության»,- ասել է սենատոր Մենենդեսը: «Այս տարի ԱՄՆ  վարչակազմը պետք է հետևի Սենատի օրինակին ու այս ողբերգությունը ճանաչի որպես ցեղասպանություն»,- ասել է նա:

Մենենդեսը տասնյակ տարիներ պայքարել է հայերի նկատմամբ իրականացված ոճրագործությունը ճանաչելու համար և 2019-ի դեկտեմբերի 12-ին սենատորը կարողացավ ստանալ Սենատի իր գործընկերների միաձայն համաձայնությունը՝ ընդունելու բանաձև, որով ամերիկացի օրենսդիրները հաստատում են Հայոց ցեղասպանության պատմական փաստերը և հարգում 1,500,000 զոհերի հիշատակը: Այս բանաձևը միաձայն ընդունելով՝ երկու կողմերի բոլոր սենատորները հաստատեցին, որ ԱՄՆ քաղաքականությունը պետք է պաշտոնապես ճանաչի Հայոց ցեղասպանությունը և մերժի ողբերգության ճշմարտությունը հերքելու ջանքերը:

Անցյալ տարի բանաձևի ընդունումից հետո Թրամփի վարչակազմը հրաժարվում է ճանաչել Հայոց ցեղասպանությունը:

Հեղինակ`Մարիամ Մխիթարյան

Ձեզ կհետաքրքրի...