iLivemap-ը Արցախը ներկայացրել է որպես Հայաստանի մաս. Greekcitytimes.com
Հունական Greekcitytimes.com կայքն անդրադարձել է Արցախի թեմային: iLivemap.com-ը Միջերկրական և հարակից տարածաշրջանի պատերազմների ու հակամարտությունների ինտերակտիվ քարտեզ է, որը ներկայացնում է շրջանում տեղի ունեցող նորությունների վերջին թարմացումները: Այն նաև Սիրիայի ու Լիբիայի հակամարտությունների վերաբերյալ ամենահավաստի աղբյուրներից մեկն է:
Թեպետ, մասնավորապես կենտրոնանալով սիրիական ու լիբիական հակամարտությունների նորությունների վրա, այն ընդլանել է աշխարհագրությունն ու անդրադարձել Արցախին ու Դոնբասին:
Հունական կայքի հավաստմամբ՝ ինտերակտիվ քարտեզի կայքը Արցախը, որը նաև հայտնի է Լեռնային Ղարաբաղ անունով, ճանաչել է Հայաստանի Հանրապետության մաս: iLivemap-ը Արցախը ներկայացրել է որպես Հայաստանի մաս:
Պարբերականը գրում է, որ Հունաստանից, և ավելի քիչ՝ Ռուսաստանից (որը նաև օժանդակում է Ադրբեջանին) ռազմական ու ֆինանսական աջակցություն ստացող Արցախը հաղթել է Ադրբեջանին ու անկախություն ձեռք բերել 1994-ին:
Չնայած ձեռք բերված անկախությանն ու ազատությանը՝ հնարավոր չի եղել Արցախը միավորել Հայաստանի Հանրապետությանը:
Այժմ ԱՄՆ-ի մի քանի առանձին նահանգներ ու Ավստրալիայի Նոր Հարավային Ուելս նահանգն են ճանաչել Արցախի Հանրապետությունը որպես անկախ պետություն:
Պարբերականը նշում է, որ Արցախում կա մեկ հունական գյուղ՝ Մեհմանա անունով, որը քիչ բնակչություն ունի:
Հոդվածի վերջում հռետորական հարց է հնչում՝ մի՞թե աշխարհն ի վերջո ուշքի է գալիս ու հասկանում, որ Արցախը ոչ թե ադրբեջանական, այլ հայկական հող է:
Հեղինակ`Մարի Կոստանյան
