Սա հեղափոխական նախագիծ է, որը բավական լուրջ փոփոխություն է ենթադրում ոլորտում․ ԿԳՄՍ նախարար
Ազգային ժողովը երկրորդ ընթերցմամբ քննարկում է Կառավարության ներկայացրած «Նախադպրոցական կրթության մասին» ՀՀ օրենքում փոփոխությունների նախագիծը:
Հարցով հիմնական զեկուցող, ԿԳՄՍ նախարար Արայիկ Հարությունյանը տեղեկացրեց, որ նախագիծը մինչև երկրորդ ընթերցում ներկայացնելը հանձնաժողովում բավական արդյունավետ աշխատանք է կատարվել, և լուրջ խմբագրումներ են տեղի ունեցել։
Նախարարը շեշտեց, որ նախագիծը հեղափոխական է և նախադպրոցական կրթության ոլորտում բավական լուրջ փոփոխություն է ենթադրում: Իսկ նախադպրոցական կրթությունը, ըստ նրա, հարնակրթության ոլորտի առաջնային օղակ՝ գլխավոր ուղղություններից է։
«Որոշակի սահմանումներ են ավելացվել։ Նախադպրոցական կրթության բնագավառում պետական քաղաքականությունը և պետական քաղաքականության սկզբունքներն են սահմանվել։ Տարանջատվել են նախադպրոցական նպատակներն ու խնդիրները։ Որպես խնդիր ավելացվել է նախադպրոցական կրթության հանրային նշանակության բարձրացումն ու որակյալ կրթության տրամադրումը, որակյալ նախադպրոցական կրթություն տրամադրելու հավասար հնարավորությունների ներառականության և մատչելիության ապահովումը խելամիտ հարմարեցումների միջոցով։ Ամրագրվել են նախադպրոցական ուսումնական հաստատություն ընդունվելու առաջնահերթությունից օգտվող խմբերը՝ առաջին կամ երկրորդ խմբի հաշմանդամություն ունեցող, երեք և ավելի երեխա ունեցող կամ զինծառայող ծնողների երեխաները և այլն»,- նշեց նախարար Արայիկ Հարությունյանը։
Նախագծով փոփոխությունների են ենթարկվել նաև մի շարք դրույթներ, այդ թվում՝ տնօրենի գործառույթներին առնչվող։
