Ռուսաստանաբնակ միլիադատեր Սերգեյ Սարկիսովը պարտավորվել է փոխհատուցել հայերի կողմից ադրբեջանական բիզնեսին պատճառված վնասը
Ռուսաստանաբնակ հայազգի միլիարդատեր, «ՌԵՍՕ-Գարանտիա» ապահովագրական ընկերության համասեփականատեր Սերգեյ Սարկիսովը, անդրադառնալով Մոսկվայում հայ և ադրբեջանական համայնքների ներկայացուցիչների միջև բախումներին, հայտարարել է, որ իր ընտանիքը պատրաստ է փոխհատուցել հայերի կողմից ադրբեջանական բիզնեսին պատճառված վնասը: Գործարարը վստահություն է հայտնել առ այն, որ իր հետ համակարծիք կլինեն ադրբեջանցի գործարարները, որոնք ևս կփոխհատուցեն անկարգությունների հետևանքով հայերի գույքին պատճառված վնասը:
Ինչպես նշում է rbc.ru-ն, միլիարդատերն այս մասին ասել է Սարկիսովների ընտանիքի, ինչպես նաև «Հայերի ասամբլեա»-ի անունից նամակ-դիմումում:
Սարկիսովն ընդգծել է, որ ամաչում է նրանց փոխարեն, ովքեր, գտնվելով հայրենիքից հեռու, սեփական ազգայնականության բարբարոսային արտահայտում են իրականացնում՝ մարդկանց ծեծելով ու սպանելով միայն ազգային պատկանելության պատճառով:
Նա դիմել է հայ և ադրբեջանական համայնքների ներկայացուցիչներին՝ կոչ անելով հրաժարվել բռնությունից ու կանգնեցնել նրանց, ովքեր, արտասահմանում գտնվելով, անկարգություններ են սադրում:
«Նախապապիս մորթել են ազգային և կրոնական ատելության հողի վրա, իսկ պապիս ու նրա քրոջը փրկել են այդ նույն ազգի այլ ներկայացուցիչներ՝ լավ մարդիկ, ովքեր վտանգել են սեփական կյանքը: Ամեն ազգի մեջ էլ կան մարդիկ, որոնցով հպարտանում ես և որոնց համար ամաչում ես: Ես և եղբայրս ծնվել և մեծացել ենք Մոսկվայում: Ես շատ ադրբեջանցի ընկերներ ունեմ՝ հրաշալի և վեհանձն մարդիկ, որոնց հետ ընկերությունն ինձ համար շատ թանկ է: Ես նրանց առաջ ամաչում եմ այն վանդալների պատճառով, որոնք որոշել են իրենց ազգային ինքնագիտակցումը դրսևորել բռնության և ավերման միջոցով: Ես ամաչում եմ իմ հայ բարեկամների ու ընկերների առաջ նրանց համար, ովքեր, իրենց հայրենիքից հեռու գտնվելով, ազգայնականության բարբարոսային դրսևորում են սկսել՝ մարդկանց սպանելով ու ծեծելով միայն այլ ազգի ներկայացուցիչ լինելու համար:
Դիմում եմ հայ և ադրբեջանական մտավորականության, բիզնես ոլորտի ներկայացուցիչներին՝ կանգնեցրեք, խելքի բերեք վանդալներին ու ծայրահեղականներին: Բացատրեք, որ մեր ազգերին հարիր չէ հարցեր պարզաբանել այն տանը, որտեղ մեզ ընդունել են, ապրելու ու աշխատելու, երեխաներին սովորելու հնարավորություն տվել: Ես նկատի ունեմ Ռուսաստանը: Մի խայտառակեք ձեր ժողովուրդներին, ձեր նախնիներին: Այն, ինչ տեղի է ունենում վերջին օրերին տանտերերի նկատմամբ անշնորհակալության և անարգանքի անթույլատրելի դրսևորում է: Կանգնեցրեք նրանց, ովքեր Ռուսաստանի սահմաններից դուրս իրենց հայրենակիցներին ծայրահեղականության և բռնության են սադրում:
Մեր ընտանիքը պարտավորվում է փոխհատուցել ադրբեջանցի գործարարների սեփականությանը հասցված վնասը, որը պատճառել են հայերը՝ հիմարության կամ մոլորվածության պատճառով հավաստացած լինելով, որ իրական տղամարդը նա է, ով ավելի բարձր է բղավում ու ապակիներ է կոտրում: Նրանց համար, ովքեր մոռացել են հիշեցնեմ՝ տղամարդը նա է, ով, նայելով աչքերի մեջ, հետ է շպրտում իրեն կամ իր ընտանիքը վիրավորողին, ով պաշտպանում է հայրենիքը ոչ թե հյուրընկալած երկրում, այլ նախնիների հողում: Վստահ եմ, որ ադրբեջանցի գործարարները մեզ հետ համակարծիք են և նույնկերպ կվարվեն»,-ասել է Սարկիսովը:
a1plus.am
-
-
