Անիի համայնքապետ Արտակ Գևորգյանը դատապարտվեց 2,5 տարվա ազատազրկման
Լուսանկարում՝ Արտակ Գեւորգյանը
Շիրակի մարզի առաջին ատյանի դատարանն այսօր Շիրակի մարզի Անի համայնքի ղեկավար Արտակ Գևորգյանին դատապարտեց 2 տարի 6 ամիս ազատազրկման և 3 տարի ժամանակով զրկեց պետական պաշտոններ զբաղեցնելու հնարավորությունից:
Հիշեցնենք, որ Արտակ Գևորգյանին մեղադրանք էր առաջադրվել ՀՀ ՔՕ ն179 հոդվածի 2 մասի (յուրացնելը կամ վատնելը), և 314 հոդվածի 1-ին մասի (պաշտոնեական կեղծիքը) հատկանիշերով:
Գևորգյանի փաստաբան Արամայիս Հայրապետյանը ՀԺ-ի հետ զրույցում տեղեկացրեց, որ համայնքի ղեկավարի նկատմամբ ազատազրկում չի կիրառվելու: «Քանի որ 2015 թվականի հոկտեմբերին, ընդունվեց և նոյեմբերին ուժի մեջ մտավ համաներման ակտ, իսկ Գևորգյանին մեղսագրվող արարքները մինչև այդ համաներման ակտն էին իբր կատարվել, համաներման ակտով պատժի կրումից դատարանը ազատեց:
Թողեց լրացուցիչ պատիժը, որը վերաբերում է պաշտոններ զբաղեցնելու իրավունքից զրկելուն, որի իրավունքը ևս չկար»,-ասաց Հայրապետյանը:
Ըստ փաստաբանի, դատարանն ընդհանրապես պետք է նման որոշում չկայացներ. «Ընդհանրապես արդարացման դատավճիռ պետք է լիներ: Այս պահին ես չեմ կարող հասկանալ, թե դատարանը փաստական հիմք որպես ինչը կարող էր հաշվի առնել, երբ որ բոլոր փաստերը հերքվել էին: Երբ որ ՊԵԿ-ը հայտարարեց, թե միլիոնների վատնումներ կան, հետո դա արդեն չապացուցվեց և հերքվեց, մնաց ընդամենն այդ գործից մեկ դրվագ՝ վարորդին վերաբերող հատվածը: Համաձայն դրա, Արտեմ Մանուկյանը 2014-18թթ գրանցված է եղել որպես վարորդ, սակայն շաբաթը մեկ անգամ այլ աշխատանքի է գնացել:
Փորձագիտակն հաշվարկով ներկայացվեց, որ 5 տարում, 2018 թվականն էլ ներառյալ, 580.000 դրամ ավելի աշխատավարձ է վճարվել: Դրանով գործն ուղարկեցին դատարան: Հետո փորձագետը դատարանում հայտարարեց, որ այլ հանգամանքներ են ի հայտ եկել, վարորդը նաև արտաժամյա աշխատանք է կատարել, ինչի դիմաց համայնքապետարանն օրենքով պարտավոր էր նրան վճարել, սակայն չի վճարել: Ստացվում է, որ վարորդը ոչ թե քիչ աշխատել շատ է վարձատրվել, այլ հակառակը՝ շատ աշխատել՝ քիչ է վարձատրվել»,-ընդգծեց նա:
Փաստաբանն ասաց, այլ մանրամասներ չի ուզում հիմա քննարկել, երբ վճիռը կստանա, կբողոքարկի: Սակայն մեկ շեշտադրում, այնուամենայնիվ ունի:
Դատարանն իրավունք չունի դադարեցնել ընտրված համայնքապետի լիազորությունը, եթե չկա կիրառված դատավճիռ: Սրանցից զատ, երբ 2019 թվականի հոկտեմբերի 8-ին ՇՄ դատախազ Կարեն Գաբրիելյանը միջորդել էր Շիրակի մարզպետին դադարեցնել Անի համայնքի ղեկավար Արտակ Գևորգյանի լիազորությունները, դատարանը գտել էր, որ պահանջն անօրինական է, և մերժել էր այն:
«Հիմա չգիտեմ ինչու, էսօր դատարանն ուրիշ դիրքորոշում հայտնեց: Դադրեցնել լիազորությունները: Այսինքն էն, ինչ-որ էս գործի նպատակն էր իմ կարծիքով: Բայց թյուր կարծիք չստեղծվի, Գևորգյանը շարունակում է պաշտոնավորումը»,-ասաց փաստաբանը:
Ըստ նրա, անգամ, եթե հաստատվեր չարաշահման փաստը, այդ պարագայում նույնիսկ, դա այն թիվը չէր, որի համար ազատազրկում պահանջվեր: Սա զուտ աշխատանքային իրավահարաբերություն է, իսկ օրենքն, ըստ Հայրապետյանի, արգելում է պետությանը քիթը խոթել նման հարաբերությունների մեջ:
«Եթե իրենց նպատակը գումարն էր, ապա 2 մլն դրամ Արտակ Գևորգյանը մինչև էս գործի դատարան ուղարկելը, դեպոզիտ գումար է մուծել: Ասել եղբայր, եթե կհամարեք, որ հանցանք եմ գործել, տարեք գումարը, եթե չէ՝ ետ տվեք:
Հիմա լավ, հաստատեցիք , որ 580.000 դրամի յուրացման հանցանք է եղել, բա 1մլն 420.000 դրամն ո՞ւր է: Էդ էլ էն վերցրել պետությանն ապօրինի: 3-4 անգամ ավել գումար է մուծել, որ չմտածեն գումարի կռիվ է: Մուծված գումարն ամբողջությամբ տարել են»,-տեղեկացրեց փաստաբանը:
Նաև մեկ խնդրի անդրադարձավ: Ասաց,արդեն 2-րդ տարին է Անի խոշորացված համայնքի համայքնապետարանի դուռը փակ է, մի խումբ ակտիվիստներ, որոնք պահանջում են համայքնի ղեկավար Արտակ Գևորգյանի հրաժրականը, թույլ չեն տալիս ներս մտնել: Սրանով հանդերձ որևէ իրապահ ոչ մի անգամ չի մոտեցել, ստեղծված իրավիճկաը հարթելու քայլ չի արել:
Համայնքապետը ստիպված աշխատանքները կազմակերպում է հեռավար տարբերակով:
«Հիմա, եթե էս մթնոլորտում քրեական գործ է քննվում, ինձ համար սա վստահելի գործընթաց չէ, շարժառիթները վստահելի չեն»,-նշեց Գևորգյանի փաստաբանը:
armtimes.com
