Ներուժս ներդնելու եմ՝ Հայաստանում ունենալու ավելի պաշտպանված շրջակա միջավայր. Պետրոսյան

Naxarar

Շրջակա միջավայրի նորանշանակ նախարար Ռոմանոս Պետրոսյանը ֆեյսբուքյան գրառմամբ շնորհակալություն է հայտնել իրեն վստահելու համար և նշել, որ իր ամբողջ ներուժը, ջանքն ու նվիրումը հետայսու ևս ներդնելու է՝ Հայաստանի Հանրապետությունում ունենալու ավելի երաշխավորված, ավելի պաշտպանված, գիտելիքահենք կառավարման և հանրության սրտացավ վերաբերմունքի ներքո զարգացող շրջակա միջավայր:

 «Սիրելի՛ հայրենակիցներ,

Հիմք ընդունելով վարչապետի առաջարկությունը` համաձայն Սահմանադրության 131-րդ հոդվածի, ինչպես նաև «Կառավարության կառուցվածքի և գործունեության մասին» օրենքի 5-րդ հոդվածի 1-ին մասի, Հայաստանի Հանրապետության նախագահ Արմեն Սարգսյանը երեկ ստորագրել է ինձ շրջակա միջավայրի նախարար նշանակելու հրամանագիրը:

Այսօր վարչապետ Նիկոլ Փաշինյանն ինձ ներկայացրել է շրջակա միջավայրի նախարարության աշխատակազմին:

Շնորհակալություն հայտնելով վարչապետին նման բարձր վստահության համար՝ վստահեցրել եմ, որ իմ ամբողջ ներուժը, ջանքն ու նվիրումը հետայսու ևս ներդնելու եմ՝ Հայաստանի Հանրապետությունում ունենալու ավելի երաշխավորված, ավելի պաշտպանված, գիտելիքահենք կառավարման և հանրության սրտացավ վերաբերմունքի ներքո զարգացող շրջակա միջավայր:

Հարգելի՛ գործընկերներ,

Ցանկանում եմ շեշտել, որ հետհեղափոխական Հայաստանում այսօր ընթանում են խորքային բարեփոխումներ բացառապես կյանքի բոլոր ոլորտներում, այդ թվում, իհարկե, շրջակա միջավայրի կառավարման ոլորտում, ինչն ուղղակիորեն ազդում է մեր հանրապետությունում կյանքի որակի վրա, և այն նշաձողը, որը սահմանվել է մինչ այժմ՝ շրջակա միջավայրի կառավարման, ընդերքօգտագործման և մյուս բաղադրիչների կառավարման ոլորտում, առկա հիմնախնդիրների լուծման կամ ավելի նորարար լուծումներ առաջադրելու գործում, պետք է հայտարարենք մեր մեկնարկային կետը, մեր պլան մինիմումը և համատեղ ջանքով բոլոր սերունդների, այս գերատեսչությունում խմբված հմտություններ, գիտելիքներ և փորձառություն ունեցող բոլոր գործիչների հետ համատեղ օր առաջ իրականացնենք Հայաստանում ավելի լավ կյանքի որակ ունենալու մղումը՝ հանուն Հայաստանի Հանրապետության, հանուն հայ ժողովրդի և Հայաստանի քաղաքացու»,- հայտնել է նախարար Ռոմանոս Պետրոսյանը:

 

1lurer.am

Ձեզ կհետաքրքրի...