Վերակառուցման և զարգացման եվրոպական բանկը դադարեցնում է ներդրումներն Ամուլսարի հանքավայրի ծրագրում
Վերակառուցման և զարգացման եվրոպական բանկը դադարեցնում է ներդրումները Հայաստանի` 400 մլն դոլար արժողությամբ խնդրահարույց ոսկու հանքավայրի ծրագրում: Այս մասին ասվում է բանկի ներկայացրած զեկույցում, որը հրապարակվել է opendemocracy.net կայքում:
«Վերջին երկու տարում Lydian International ընկերության նախագիծը` կապված Ամուլսարի հանքավայրի շահագործման հետ, արգելափակված է եղել տեղի բնակիչների և բնապահպան ակտիվիստների կողմից, որոնք փակել են մուքտը դեպի հանքավայր 2018 թվականին տեղի ունեցած «Թավշյա հեղափոխությունից» հետո: ՎԶԵԲ-ի ներդրումային ծրագրի կասեցման մասին լուրը հաջորդել է վերջին շաբաթներին Ամուլսարում բողոքի ցույցերի վերսկսմանը»,- ասվում է հոդվածում:
Նշվում է, որ Լոնդոնում գործող զարգացման բանկը 2009 թվականից ֆինանսավորել է Ամուլսարում իրականացված հետազոտական, հորատման և տեխնիկատնտեսական հիմնավորման աշխատանքներն ու Lydian-ի կողմից նախաձեռնվող բնապահպանական և սոցիալական հետևանքների մեղմացմանն ուղղված միջոցառումները: Բանկը հայտնվել է հասարակական քաղաքացիական խմբավորումների բողոքի կենտրոնում և քննադատության է ենթարկվել Lydian-ին աջակցելու համար:
«ՎԶԵԲ-ը պարտավոր է հանրությանը ներկայացնել պատշաճ բացատրություն նախագծի և ընթացիկ զարգացումների վերաբերյալ իր դիրքորոշման մասին: Ամուլսարում Lydian-ի անվտանգության ընկերության կողմից վերջերս տեղի ունեցած սադրանքը ընդամենը նշանն է այն վնասի, որ այդ ներդրումները շարունակելու են հասցնել ՎԶԵԲ-ի հեղինակությանը անգամ, երբ այն դադարի իր բաժնեմասն ունենալ Lydian International-ում»,- ասել է CEE Bankwatch Network կազմակերպության՝ ՎԶԵԲ-ի քաղաքականության գծով տնօրեն Ֆիդանկա Մաքգրատը:
auroranews.am
