Հաստատվել են նոյեմբերի 9-ի հայտարարության արդիականությունը և դրան այլընտրանք չլինելը. Լավրով
ՌԴ արտգործնախարար Սերգեյ Լավրովը մամուլի ասուլիս է հրավիրել՝ ամփոփելով ՌԴ պատվիրակության այցն Ադրբեջան:
«Լիովին հաստատվել են Ռուսաստանի, Հայաստանի և Ադրբեջանի ղեկավարների՝ նոյեմբերի 9-ին ստորագրած հայտարարության արդիականությունը և դրան այլընտրանք չլինելը: Դա մի համաձայնություն էր, որը կանգնեցրել է արյունահեղությունը՝ հիմք դրել Լեռնային Ղարաբաղի շուրջ ստեղծված իրավիճակի երկարատև կարգավորման համար: Ադրբեջանի նախագահն ընդգծել է եռակողմ հայտարարության բոլոր տարրերի հետևողական, բարեխիղճ իրագործման կարևորությունը: Քննարկել ենք նաև ուղղությունների մի ամբողջ շարք, որոնք կնպաստեն այդ ամենի իրագործմանը և որոնք մենք կիրականացնենք ադրբեջանական և հայկական կողմերի հետ: Շահագրգռված ենք, որ միջազգային կազմակերպությունները, ՄԱԿ-ի կառույցները, Կարմիր խաչն ակտիվորեն կներգրավվեն հումանիտար խնդիրների լուծմանը: Նրանք պետք է համագործակցեն ռուս խաղաղապահների, հումանիտար արձագանքման կենտրոնի հետ: Ադրբեջանի նախագահը կոնկրետ առաջարկներ ուներ, թե ինչպես այդ աշխատանքը դարձնել առավել արդյունավետ»,- հայտարարել է Սերգեյ Լավրովը:
