Հայտնի չէ, թե Ռոբերտ Քոչարյանին ինչի հիման վրա է թույլատրվում մեկնել ՀՀ-ից. դատախազ
«Մարտի 1»-ի գործով այսօրվա դատական նիստի սկզբում դատախազ Գևորգ Բաղդասարյանը հանդես եկավ հայտարարությամբ: Նա տեղեկացրեց, որ դատարանը թույլատրել է ամբաստանյալ Ռոբերտ Քոչարյանին փետրվարի 3-8-ը մեկնել ՀՀ-ից, և դրա հիման վրա դատարանը խնդրել է իրավապահներին Քոչարյանի վերաբերյալ սահմանափակումները ժամանակավորապես վերացնել, հետո կրկին կիրառել: Դատախազն ասաց, որ իրենց հայտնի չէ՝ Ռոբերտ Քոչարյանին ինչի հիման վրա է թույլատրվում մեկնել ՀՀ-ից:
«Նախորդ դատական նիստերից մեկում մենք այս հարցը բարձրացրել ենք, բայց դատարանից որևէ պարզաբանում չենք ստացել: Մեզ հայտնի չէ, թե Ռոբերտ Քոչարյանին ինչի՛ հիման վրա է թույլատրվում մեկնել ՀՀ-ից, ինչով է դա պայմանավորված: Վստահ եմ՝ մենք դրան պետք է տեղեկացված լինենք, քանի որ ամբաստանյալի՝ դատական նիստերի մասնակցությունը և դրա հետ կապված բոլոր ռիսկերը շոշափում են մեր կողմից իրականացվող մեղադրանքի պաշտպանության սահմանադրական գործառույթը: Հետևաբար մենք պետք է հավասարապես տեղեկացված լինենք այդօրինակ գրությունների պատճառների մասին, մասնակցելու դրանց քննարկմանը, հայտնելու դիրքորոշումներ, առարկելու կամ համաձայնելու»,- ասաց դատախազ Բաղդասարյանը:
Դատավոր Աննա Դանիբեկյանն էլ նշեց, թե դատավարության յուրաքանչյուր մասնակից իրավունք ունի ծանոթանալ գործերի նյութերին ու ստանալ տեղեկություններ, և որ դատախազները կարող են ծանոթանալ հիմքերին:
Այնուհետև դատարանն անցավ պաշտպանական կողմի՝ դատավոր Դանիբեկյանին բացարկ հայտնելու միջնորդության քննարկմանը:
