Մարտի 3-ին Հանրապետական կուսակցությունը Սերժ Սարգսյանի հրաժարականի պահանջ էր ներկայացնում. Հակոբ Բադալյան
Մարտի 3-ը հայաստանյան քաղաքական օրացույցում հետաքրքիր ամսաթիվ է: 2000 թվականի մարտի 3-ին Հանրապետական կուսակցությունը Սերժ Սարգսյանի հրաժարականի պահանջ էր ներկայացնում նախագահ Ռոբերտ Քոչարյանին՝ հոկտեմբերի 27-ի քննության գործընթացի համատեքստում: Պահանջը ներկայացնում էին այն ժամանակ ՀՀԿ նախագահ Անդրանիկ Մարգարյանը, այն ժամանակ ՀՀԿ անդամ, վարչապետ Արամ Սարգսյանը, ՀԺԿ նախագահ Ստեփան Դեմիրճյանը՝ Միասնություն դաշինքի տրամաբանությամբ, եւ Գագիկ Ջահանգիրյանը, որը քննում էր 27-ի գործը: Պահանջում էին Սերժ Սարգսյանի հրաժարական, որը ազգային անվտանգության նախարարի պաշտոնը թողնելուց հետո նշանակվել էր նախագահ Քոչարյանի աշխատակազմի ղեկավար: Պահանջն իհարկե չկատարվեց: Մոտ երեք ամիս անց Արամ Սարգսյանը այլեւս ՀՀԿ հետ չէր, Անդրանիկ Մարգարյանը Արամ Սարգսյանի փոխարեն նշանակվեց վարչապետ, Սերժ Սարգսյանը Մարգարյանի կառավարությունում պաշտպանության նախարար՝ ի դեպ ներկայիս նախարար Վաղարշակ Հարությունյանի փոխարեն, դե իսկ Գագիկ Ջահանգիրյանն էլ զինդատախազի իր տեղում՝ մինչեւ 2008 թվական:
