Սարգիս Քլոյանը դատի է տվել Սայաթ Շիրինյանին
Մարտի 1-ի զոհերից՝ Գոռ Քլոյանի հայրը՝ Սարգիս Քլոյանը դատի է տվել ՀՀ ոստիկանության հասարակայնության հետ կապի եւ լրատվության վարչության նախկին պետ, գնդապետ Սայաթ Շիրինյանին: Այս մասին տեղեկանում ենք Դատական տեղեկատվական համակարգից:
Նա պահանջում է հատուցել պատվին եւ արժանապատվությանը հասցված վնասը:
Քլոյանի ներկայացուցիչ Տիգրան Եգորյանը ՀԺ-ի հետ զրույցում հայտնեց, որ Շիրինյանը փետրվարի 1-ին իր ֆեյսբուքյան էջում ե՛ւ զրպարտող ե՛ւ վիրավորական հայտարարություններ է արել Գոռ եւ Սարգիս Քլոյանների հասցեին:
«Գոռ Քլոյանի վերաբերյալ թմրամոլ լինելու մասին էր հայտարարություն արել, Սարգիս Քլոյանի մասին հայտարարել էր, թե Գոռի երեխաներին դրամական աջակցություն չի հատկացնում: Այսպիսի կեղտոտ, էժան, ստոր գնահատականներ եւ պնդումներ են արվել, որոնք սուտ են, զրպարտող են, արատավորող են»,- ասաց Եգորյանը:
Հարցին՝ ի՞նչ է պահանջում Սարգիս Քլոյանը, Եգորյանը պատասխանեց. «Պահանջում ենք ներողություն խնդրել եւ 2 մլն դրամ փոխհատուցում վճարել»:
Հայցը ներկայացվել է 2021 թվականի մարտի 3-ին եւ մակագրվել Երեւան քաղաքի ընդհանուր իրավասության դատարանի դատավոր Արմեն Դանիելյանին:
armtimes.com
