Օնիկ Գասպարյանի պաշտոնավարման վերաբերյալ Վարչական դատարանի որոշումը հարկադիր կատարում չի ենթադրում. Բադասյան
ՀՀ նախագահը ներկայացրել է առարկություն ԳՇ պետին պաշտոնից ազատելու վարչապետի միջնորդության վերաբերյալ, ինչը Կառավարության ղեկավարի կողմից չի ընդունվել, իսկ Սահմանադրության 139-րդ հոդվածի 2-րդ մասը հստակ կանոնակարգում է, որ այդ ակտն իրավունքի ուժով ուժի մեջ է մտնում: Այդ մասին ԱԺ-ում լրագրողների հետ ճեպազրույցում ասաց արդարադատության նախարար Ռուստամ Բադասյանը:
«Սահմանադրական այդ նորմը որևէ շրջադարձի հնարավորություն թույլ չի տալիս: Գործ ունենք այնպիսի գործընթացի ավարտի հետ, ըստ որի՝ ԳՇ պետն ազատված է զբաղեցրած պաշտոնից, իսկ Վարչական դատարանի որոշումը որևէ հարկադիր կատարում չի ենթադրում, Սահմանադրական նորմերը հնարավոր չէ այնպես մեկնաբանել, որով իրավիճակը կբերի նախկին իրավիճակի»,- պարզաբանեց նախարարը:
Բադասյանը հայտնեց, որ Արտակ Դավթյանին ԳՇ պետի պաշտոնում նշանակելու հետ կապված գործում է Սահմանադրության նույն նորմը: «Նախագահի կողմից արդեն իսկ հայտարարություն եղել է, որ նա չի ստորագրելու միջնորդությունը, չի դիմելու նաև ՍԴ, ուստի Սահմանադրության դրույթի իրավունքի ուժով վրա է հասնելու Դավթյանի նշանակումը, այս հարցում գործադրի կամքից այլևս ոչինչ կախված չէ»,- ընդգծեց նա:
-
-
