Թվով՝ 3-րդը. Ադրբեջանցիները պղծել են հերթական եկեղեցին. այս անգամ Մատաղիսի ս. Եղիշե եկեղեցին էր. Sputnik Արմենիա
Համացանցում հայտնվել է ադրբեջանցիների կողմից իրականացվող մշակութային եղեռնի հերթական փաստն ապացուցող տեսանյութը:
Տեսագրության մեջ չի նշվում, թե այս անգամ որ եկեղեցին է ադրբեջանցի վանդալների սրբապղծության զոհ դարձել, բայց Sputnik Արմենիայի թղթակցին հաջողվել է պարզել, որ դա Մատաղիսի հյուսիսարևմտյան հատվածում գտնվող, 1892-1898 թվականներին կառուցված Սուրբ Եղիշե Առաքյալ եկեղեցին է:
Տեսանյութում ադրբեջանական զինվորական համազգեստով երեք տղամարդ մտնում են հայկական եկեղեցի և հայտարարում, որ մտադիր են այնտեղ նամազ իրականացնել: Նրանցից մեկի հագուստի վրա Թուրքիայի և Ադրբեջանի դրոշներով տարբերանշան կա: Տղամարդիկ հայհոյում են, կոտրում սրբապատկերները: Տեսանյութի վերջում ներկայացված է նաև Ադրբեջանի վերահսկողության տակ անցած Մեխակավանի (Ջաբրայիլ) գտնվող Զորավոր Սուրբ Աստվածածին (Սուրբ Աստվածածին) հիմնահատակ ավերված եկեղեցու լուսանկարը, ինչի արդյունքում տպավորություն է ստեղծվում, թե տեսանյութում նույն եկեղեցին է նախքան ավերվելը: Մինչդեռ իրականում սա վերջին մի քանի օրվա ընթացքում ադրբեջանցիների կողմից պղծված արդեն երրորդ եկեղեցին է:
