46-ամյա վարորդը Volkswagen-ով բախվել է «Ազատ» գետի վրա կառուցված կամրջի երկաթե ճաղավանդակներին, կոտրել այն և հայտնվել «Ազատ» գետում. կան վիրավորներ.
Երեկ՝ հունիսի 20-ին, կասկադյորական ավտովթար է տեղի ունեցել Արարատի մարզում։ Ժամը 21։25-ի սահմաններում Գեղարքունիքի մարզի բնակիչ՝ 46-ամյա Արամայիս Հ-ն իր վարած Volkswagen Jetta մակնիշի ավտոմեքենայով Ազատավան-Բուրաստան գյուղամիջյան ճանապարհին դեռևս անհայտ հանգամանքներում դուրս է եկել ճանապարհի երթևեկելի գոտուց, բախվել «Ազատ» գետի վրա կառուցված կամրջի մետաղյա արգելապատնեշներին, կոտրել այն և մոտ 4 մետր բարձրությունից հայտնվել գետի մեջ։ Ինչպես հայտնում է ֆոտոլրագրող Գագիկ Շամշյանը, օպերատիվորեն դեպքի վայր են ժամանել Արտակարգ իրավիճակների նախարարության փրկարար ծառայության թիվ 23 հրշեջ-փրկարարական ջոկատը՝ 1 մարտական հաշվարկով։ Վթարի հետևանքով քաղաքացիների օգնությամբ վարորդ Արամայիս Հ-ն ուղևորներ՝ Գեղարքունիքի մարզի բնակիչներ, 14-ամյա Էրիկ Զ-ն, 67-ամյա Ռաֆիկ Ա-ն դուրս են բերվել գետից և տեղափոխվել «Արտաշատ» բժշկական կենտրոն։ Օպերատիվ են գործել Արտաշատի հիվանդանոցի բժիշկները։ Դեպքի վայր են ժամանել ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ վաշտի հրամանատար Գրիգոր Պողոսյանի, դասակի հրամանատար Կարապետ Հարությունյանի գլխավորությամբ։ Տեղում հետաքննական աշխատանքները ղեկավարել է նույն վաշտի ավագ հետաքննիչ Անուշավան Սաղոյանը։ Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է ոստիկանության Արտաշատի բաժին, որտեղից ժամանել է օպերատիվ խումբը՝ բաժնի պետ Դավիթ Պետրոսյանի գլխավորությամբ։
shamshyan.com
