Forbes-ը՝ Լեռնային Ղարաբաղից տեղահանված կնոջ ողբերգական պատմության հետքերով
Forbes հանդեսում հրապարակվել են տեղահանված փախստական կանանց պատմություններ, որոնք համաշխարհային գերտերությունների ձախողման վկայություն են:
Պատերազմների, հակամարտությունների, կլիմայի փոփոխությունների, տեխնածին և բնական աղետների պատճառով ծագած փախստականների գլոբալ ճգնաժամն ավելի է սրվում համավարակի պատճառով և անհամաչափորեն ազդում կանանց և երեխաների վրա՝ փոխանցում է Forbes հանդեսը:
Ողբերգական ճակատագրի արժանացած կանանց պատմություններից մեկն էլ Լեռնային Ղարաբաղի բնակիչներից մեկինն է:
Մինչև 2020-ի դեկտեմբերը Լեռնային Ղարաբաղի 145 հազար բնակչությունից 100 հազարը ստիպված են եղել հեռանալ իրենց տնից Թուրքիայի և Ադրբեջանի սանձազերծած 44-օրյա պատերազմի պատճառով:
Տեղահանվածները՝ հիմնականում կանայք, երեխաներն ու տարեցներն ապաստան են գտել Հայաստանում:
Լեռնային Ղարաբաղի միջին տարիքի տեղահանված բնակչուհին այժմ ժամանակավորապես ապրում է Հայաստանի Գեղարքունիքի մարզում: Նա երազում է վերադառնալ տուն, որն այժմ ադրբեջանական վերահսկողության տակ է:
«Կարևոր չէ, որ մենք կորցրել ենք մեր տունն ու ունեցվածքը: Սարսափելին այն է, որ պատերազմի ժամանակ կորցրել եմ իմ միակ որդուն, իմ հարազատներին»,- պատմել է կինը՝ բացատրելով, թե ինչու է ողբերգությունից հետո ամուսինը մեկնել Ռուսաստան:
Նրա վիշտն այնքան խորն է, որ կինը ոչինչ չի կարողանում արժևորել իր կյանքում:
«Հուսով եմ՝ նոր կյանք սկսելու հնարավորություն կընձեռվի»,- ասել է նա:
