ԱՄՆ-Ում Ստեղծվել Է Ձեռքի Ռոբոտացված Ճկուն Պրոթեզ․ Արժեքը՝ 500 $
Մասաչուսեթսի տեխնոլոգիական ինստիտուտի (MIT) և Շանհայի համալսարանի (Չինաստան) գիտնականները նախագծել են փափուկ նյութերից պատրաստված ձեռքի պրոթեզ, որը կարող է կառավարվել ուղեղի ազդակների միջոցով։ Սարքի արժեքը սկսվում է 500 դոլարից։
Ծրագրի ղեկավար, MIT-ի պրոֆեսոր Սյուանե Չժաոյի խոսքով, պրոթեզը պատրաստված է սիլիկոնից և ածխածնային մանրաթելից: Այն շատ ավելի թեթև է, քան տիտանից կամ կոշտ նյութերից պատրաստված նույնատիպ պրոթեզները: Արհեստական ձեռքը կառավարվում է սեղմված օդի միջոցով և թույլ է տալիս վերցնել նուրբ առարկաները՝ առանց դրանք կոտրելու վտանգի: Գիտնականը կոնստրուկցիան համեմատել է ռետինե ձեռնոցի հետ:
Պրոթեզը կարող է վերահսկվել մտքի ուժով՝ սենսորների միջոցով, որոնք հավաքում են մկանների էլեկտրական ազդակները․ սարքը միանգամից ուղեղից հրամաններ չի ստանում։ Մինչև օգտագործումը, ծրագիրը հուշում է օգտագործողին մտածել մի քանի ժեստերի մասին, օրինակ՝ սեղմել, պահել և այլն, ապա սենսորները ֆիքսում են բոլոր ազդանշանները և դրանք փոխանցում մանիպուլյատորին:
Պրոթեզի մատների ծայրերի վրա տեղադրված են նաև շոշափելիքի տվիչներ, որոնք օգնում են հասկանալու՝ արդյո՞ք ձեռքը կպել է անհրաժեշտ առարկային, թե ոչ։
Այժմ նախագծի վրա աշխատող գիտնականները մտադիր են արագացնել պրոթեզի արձագանքը հրամաններին և ավելացնել ժեստերի թիվը: Նրանք հույս ունեն, որ այսկերպ կօգնեն անդամահատված կամ չզարգացած վերին վերջույթներ ունեցող միլիոնավոր մարդկանց: Միևնույն ժամանակ, սարքի գինը համեմատաբար մատչելի կլինի աշխարհի բնակչության մեծամասնության համար և համեմատելի կլինի նոր iPhone-ի արժեքի հետ:
