Մեզ համար չափազանց կարևոր է հայ-նիդերլանդական առևտրատնտեսական կապերի սերտացումը. Մհեր Գրիգորյան
Փոխվարչապետ Մհեր Գրիգորյանը մասնակցել է Նիդերլանդների ազգային միասնությունը խորհրդանշող տոնի՝ Թագավորի օրվա կապակցությամբ Նիդերլանդների դեսպանության կողմից կազմակերպված միջոցառմանը: Միջոցառման շրջանակներում փոխվարչապետը շնորհավորել է տոնի առթիվ և մաղթանքներ հղել Նիդերլանդների կառավարությանն ու Նիդերլանդների բարեկամ ժողովրդին:
Փոխվարչապետը մասնավորապես նշել է.
«Մեր երկրների միջև դիվանագիտական հարաբերությունների հաստատման հոբելյանական 30-րդ տարում կարող ենք գոհունակությամբ արձանագրել, որ երկու երկրների միջև ձևավորվել է միջպետական արդյունավետ և բազմաբովանդակ համագործակցություն` հիմնված փոխադարձ հարգանքի և վստահության վրա: Մեր միջպետական հարաբերություններն առավել դինամիկ հունով զարգանալու և համագործակցության ամենատարբեր ոլորտներ ընդգրկելու մեծ ներուժ ունեն։
Ուրախությամբ եմ նշում, որ այսօր մեր երկու երկրների միջև առկա քաղաքական երկխոսությունը լավագույնս է արտահայտվում տարբեր մակարդակի փոխայցերով: Դրա վկայությունն է այս տարվա մայիսին նախատեսվող միջպետական հարաբերությունների 30-ամյա պատմության ընթացքում Հայաստանի վարչապետի առաջին պաշտոնական այցը Հաագա։
Համոզված եմ, որ այցը որակապես նոր լիցք կհաղորդի մեր բարեկամ երկրների միջև սերտ հարաբերությունների ամրապնդմանը և համապարփակ զարգացմանը։ Հայաստանը բարձր է գնահատում տարիներ շարունակ Նիդերլանդների կառավարության նախաձեռնությամբ Հայաստանում իրականացվող զարգացման տարաբնույթ ծրագրերը: Մեզ համար չափազանց կարևոր է նաև հայ-նիդերլանդական առևտրատնտեսական կապերի սերտացումը:
Պատրաստ ենք անհրաժեշտ քայլեր ձեռնարկել` մեր երկրների գործարար շրջանակների համագործակցությունը խրախուսելու ուղղությամբ: Ցանկանում եմ ընդգծել, որ Հայաստանն ու հայ ժողովուրդը մեծապես երախտապարտ են Արցախի դեմ սանձազերծված պատերազմի ընթացքում արցախահայության դեմ իրականացված ապօրինությունների և ռազմական հանցագործությունների բարձրաձայնման և դատապարտման հարցում Նիդերլանդների վճռական սկզբունքայնության համար:
Դա մարդու իրավունքների և հիմնարար ազատությունների պաշտպանության և համամարդկային արժեքների առաջմղման հարցում Նիդերլանդների հանձնառության ակնառու դրսևորում է։ Վստահ եմ, որ բարեկամության և փոխըմբռնման ոգով զարգացող հայ-նիդերլանդական հարաբերությունները, որոնցում իր արժեքավոր ներդրումն ունի նաև Հայաստանում Նիդերլանդների դեսպանությունը և անձամբ Դուք, պարոն դեսպան, այսուհետ ևս շարունակելու են նոր հաջողություններ արձանագրել։
Ցանկանում եմ կրկին շնորհավորել բոլորիս Նիդերլանդների ազգային տոնի կապակցությամբ և մաղթել Արքայական Մեծությանը քաջառողջություն, իսկ Նիդերլանդների բարեկամ ժողովրդին՝ խաղաղություն և բարօրություն»:
-
-
