Դոնեցկում մահապատժի են դատապարտվել Ուկրաինայի զինված ուժերում կռված երկու բրիտանացի և մարոկկացի
Դոնեցկի դատարանը բրիտանացիներ Շոն Փիններին և Էյդեն Ասլինին, ինչպես նաև Մարոկկոյի քաղաքացի Սաադուն Բրահիմին մեղավոր է ճանաչել վարձկանության, իշխանությունը բռնությամբ զավթելու փորձի, ինչպես նաև ահաբեկչական գործունեություն իրականացնելու նպատակով վերապատրաստվելու համար՝ գրում է BBC-ն։
Երեքն էլ Ուկրաինայի զինված ուժերի անդամներ են, որոնք պայմանագրեր են կնքել մինչև ռուսական հատուկ ռազմական գործողության սկիզբը։ Նրանք առնվազն մի քանի տարի ապրել են Ուկրաինայում, նրանցից մեկն ունի ուկրաինական անձնագիր։ Երեքն էլ մահապատժի են դատապարտվել։
Բրիտանական իշխանությունները ԴԺՀ-ին հորդորել են «գթասիրտ լինել» գերի ընկած բրիտանացիների հանդեպ։ Իսկ փոխվարչապետ Դոմինիկ Ռաաբը խոստացել է ներկայացնել բոլոր անհրաժեշտ բողոքները՝ դատավճիռը վիճարկելու համար։
Շոն Փիններն ու Էյդեն Ասլինը, ավելի վաղ, խնդրել էին վարչապետ Բորիս Ջոնսոնին՝ օգնել իրենց Ուկրաինայի «Ընդդիմադիր հարթակ՝ հանուն կյանքի» կուսակցության ղեկավար, քաղաքական գործիչ և գործարար Վիկտոր Մեդվեդչուկի հետ փոխանակելու հարցում: Մեդվեդչուկը ներկայումս կալանքի տակ է դավաճանության կասկածանքով։
Մեծ Բրիտանիայի վարչապետի գրասենյակը հայտարարել է, որ «խորապես անհանգստացած է» բրիտանացիների նկատմամբ կայացված մահապատժի վճռով:
Դատապարտվածների փաստաբան Պավել Կոսովանն էլ հայտարարել է, որ իր պաշտպանյալները մահապատժի չէին սպասում և մտադիր են վճիռը բողոքարկել։
