Չեք պատկերացնի, թե այս կոչումների շուրջ անցյալում ինչ խայտառակ փոխգործակցություններ են եղել. Խզմալյան
Կոչումները չեղարկելու հետ կապված բոլոր հիմնավորումները տրվել են եւ կտրվեն, եւ ես շատ ակտիվ ելույթներ եմ ունենալու այս կապակցությամբ: Պարզապես մի բան պիտի նկատի ունենանք. այս նախագիծը չի վերաբերում այն մարդկանց, որոնք արդեն կոչում ունեն, ունեցողները թող բարով վայելեն:
Այս մասին այսօր լրագրողների հետ զրույցում ասաց ՀՀ ԿԳՄՍ փոխնախարար Արա Խզմալյանը՝ անդրադառնալով նախարարության ներկայացրած՝ «ՀՀ պետական պարգևների և պատվավոր կոչումների մասին» օրենքում փոփոխություններ կատարելու մասին» օրենքի նախագծին:
«Կարծում եմ՝ մեր ստեղծագործական հանրության ողջամիտ հատվածը համակրում է այս նախագիծը: Այսօր լսեցի պարոն Արմեն Էլբակյանի կարծիքը, որը ՀՀ ժողովրդական արտիստ է: Նա ասաց, որ այս կոչումները ստեղծվել են հանրությանը կախվածության մեջ պահելու համար: Իմ խորին համոզմամբ՝ այս փոփոխությամբ մեծանում է արվեստագետի ազատությունը, անկախությունը որեւէ քաղաքական իշխանությունից: Հիմա իմ կողքին նստած է Հարություն Խաչատրյանը, որը ժողովրդական արտիստ է: Անկեղծ ասած՝ երբեք չեմ հիշում, որ նա այդ կոչումն ունի, ու այնպես չէ, որ իր արժեքն այդ կոչման մեջ է եղել»,- շեշտեց նա՝ հավելելով՝ եկեք գնանք շոշափելի, կոնկրետ արդյունքների հետեւից, ոչ թե կեղծ արդյունքների ու տիտողոսների:
Խզմալյանի խոսքով՝ այդ տիտղոսներն ամեն տարի զառանցանքի են վերածվում: Փոխնախարարի փոխանցմամբ՝ ամեն Սեպտեմբերի 21-ին կամ Մայիսի 28-ին իր աշխատասենյակում կոչումների քաոսային քննարկումներ են լինում. «Այս կոչումների շուրջ անցյալում խայտառակ փոխգործակցություններ են եղել: Չեք պատկերացնի, թե ով ինչի է զիջել եւ ինչ է ստացել դրա դիմաց»:
-
-
