Չինաստանը Հայաստանին և Ադրբեջանին կոչ է արել խուսափել իրավիճակի սրումից
Չինաստանը հուսով է, որ Հայաստանն ու Ադրբեջանը քաղաքական երկխոսության ճանապարհով կվերացնեն տարաձայնությունները, ինչպես նաև կհետևեն կրակի դադարեցման մասին պայմանավորվածությունների կատարմանը, որոնք ձեռք էին բերվել 2020 թվականի աշնանը Լեռնային Ղարաբաղում 44-օրյա պատերազմի արդյունքներով։ Այս մասին այսօր ճեպազրույցի ժամանակ հայտարարել է երկրի ԱԳՆ պաշտոնական ներկայացուցիչ Վան Վենբինը, փոխանցում է Oops Top-ը։ «Մենք հուսով ենք, որ երկու կողմերն էլ կպահպանեն հրադադարի պայմանավորվածությունները, ինչպես նաև կխուսափեն իրավիճակի հետագա սրումից»,- ասել է Վենբինը՝ շեշտելով, որ երկու երկրներն էլ Չինաստանի համար բարեկամական են։ Պեկինը ուշադրություն է դարձնում Լեռնային Ղարաբաղի շփման գծում իրավիճակի վերջին սրման մասին լուրերին, նշել է Չինաստանի ԱԳՆ ներկայացուցիչը։ Տաթև Ֆռանգյան
