Պուտինը ճանաչել է Խերսոնի և Զապորոժիեի շրջանների «անկախությունը». ինչու էր դա անհրաժեշտ, և ինչ է սպասվում հետո. armtimes
Ռուսաստանի նախագահ Վլադիմիր Պուտինը հրամանագրեր է ստորագրել՝ Ուկրաինայի Զապորոժեի և Խերսոնի շրջանների անկախությունը ճանաչելու մասին։ Փաստաթղթերի տեքստերը հրապարակված են իրավական տեղեկատվության պաշտոնական պորտալում, դրանք համարվում են ուժի մեջ մտած։
Սա նախնական գործընթացն է այս տարածքների, ինչպես նաև Դոնեցկի և Լուգանսկի շրջանների՝ Ռուսաստանին «միանալու» ամբողջական գործընթացի համար: Հիշեցնենք՝ Դոնեցկն ու Լուգանսկը 2014 թվականին հռչակվել էին «ժողովրդական հանրապետություններ»։
Փաստաթղթերի տեքստերում ասվում է, որ որոշումն ընդունվել է «միջազգային իրավունքի ընդհանուր ճանաչված սկզբունքներին և նորմերին համապատասխան՝ ճանաչելով և հաստատելով ՄԱԿ-ի կանոնադրությամբ ամրագրված հավասար իրավունքների և ժողովուրդների ինքնորոշման սկզբունքը» և «հաշվի առնելով ժողովրդի կամքը սեպտեմբերի 27-ին կայացած հանրաքվեի ժամանակ»:
Հինգշաբթի օրը ՄԱԿ-ի գլխավոր քարտուղար Անտոնիո Գուտերեշը «Թվիթեր»-ում գրել է, որ «որևէ պետության տարածքի ցանկացած բռնակցում մեկ այլ պետության կողմից, որը բխում է ուժի սպառնալիքից կամ կիրառումից, խախտում է [ՄԱԿ-ի] կանոնադրության և միջազգային իրավունքի սկզբունքները»։
Ռուսաստանի իշխանությունները ճանաչեցին ինքնահռչակ Դոնեցկի և Լուգանսկի «ժողովրդական հանրապետությունների» անկախությունը փետրվարի 24-ին՝ Ուկրաինայի ներխուժումից առաջ։ Ռուսական զորքերի գործողությունները բացատրվում էին այդ կազմավորումներին ռազմական օգնություն ցուցաբերելու անհրաժեշտությամբ, սակայն ռուսական բանակը փորձեց գրավել ոչ միայն Դոնբասի տարածքները, այլև Ուկրաինայի այլ հատվածներ, այդ թվում՝ Կիևի, Չեռնիգովի, Ժիտոմիրի շրջանները, Սումիի, Խարկովի, Զապորոժիեի, Նիկոլաևի և Խերսոնի շրջանները։
Այժմ ռուսական զորքերը վերահսկում են Խերսոնի գրեթե ողջ շրջանը, ինչպես նաև Զապորոժիեի (ոչ մարզկենտրոնի), Դոնեցկի և Լուգանսկի մի մասը։ Նրանք ամբողջությամբ չեն գրավել ուկրաինական այս շրջաններից ոչ մեկը։
Սեպտեմբերի 27-ին Ուկրաինայի 4 շրջանում ավարտվել է Ռուսաստանին միանալու հնգօրյա «հանրաքվեն»։ Դրանց արդյունքները չեն ճանաչել աշխարհի ոչ մի երկիր, միջազգային կազմակերպությունների ներկայացուցիչները հայտարարեցին, որ այս ընթացակարգը կազմակերպվել է ռազմական օկուպացիայի պայմաններում և իրավական որևէ հենք չի կարող ունենալ։ Ուկրաինայի նախագահ Վլադիմիր Զելենսկին դրանք ֆարս է անվանել, որի արդյունքները, ըստ նրա, կազմակերպիչներին նախապես հայտնի են եղել։
Ի՞նչ է լինելու հաջորդիվ
Չորեքշաբթի երեկոյան հայտնի դարձավ, որ Ռուսաստանի նշանակած այս 4 շրջանի ղեկավարները ուղևորվել են Մոսկվա։ Մինչ այդ նրանցից յուրաքանչյուրը դիմում էր հրապարակել Վլադիմիր Պուտինին՝ իրենց տարածաշրջանը Ռուսաստանի կազմում ներառելու պաշտոնական խնդրանքով։
Զապորոժիեի և Խերսոնի շրջանների անկախության հռչակման ընթացակարգի մասին ոչինչ չէր հաղորդվել։
Սպասվում է, որ այսօր՝ սեպտեմբերի 30-ին, Պուտինը «համաձայնագրեր» կստորագրի վերը նշված 4 ուկրաինական տարածքները Ռուսաստանի կազմում ներառելու վերաբերյալ։ Արարողությունը նախատեսված է Մոսկվայի ժամանակով ժամը 15:00-ին, Կրեմլի Գեորգիևսկի դահլիճում։ Պուտինի մամուլի քարտուղար Դմիտրի Պեսկովը խոստացել է, որ նախագահի «ծավալուն ելույթը» տեղի կունենա։
Այսօր ՌԴ իշխանությունները նաև հանրահավաք-համերգ են նշանակել Կարմիր հրապարակում, ըստ ՏԱՍՍ-ի՝ «ի պաշտպանություն Դոնեցկի, Լուգանսկի Զապորոժիեի և Խերսոնի շրջանները Ռուսաստանի կազմի մեջ մտնելու վերաբերյալ հանրաքվեների արդյունքների»: Սպասվում է, որ Պուտինը ներկա կլինի այս միջոցառմանը։
Այժմ, ինչպես գրում է «Կոմերսանտ»-ը, չորս շրջանի հետ պետք է կնքվեն միջազգային պայմանագրեր, որոնք ՌԴ նախագահը վավերացման կներկայացնի Դաշնային ժողովին նոր սուբյեկտների ընդունման մասին օրինագծերի հետ միասին։
Ռուսաստանի խորհրդարանի երկու պալատում ուկրաինական տարածքների «բռնակցման» վերաբերյալ քվեարկությունը սպասվում է միայն հաջորդ շաբաթ, հետո դա կարող է ամրագրվել Ռուսաստանի Սահմանադրությամբ։
