Երևանի մետրոպոլիտենը 32 անվազույգի ու 200 մլն դրամի պահեստամասերի կարիք ունի. Ավինյանը խոստացավ անձամբ զբաղվել խնդրով
Հոկտեմբերի 6-12-ը Երևանի մետրոպոլիտենում ուղևորափոխադրումը կազմել է 563 407 ուղևոր, գիծ է դուրս բերվել 2758 գնացք, կատարողականը` 118 տոկոս: Երևանի ավագանու գործակարգավարական խորհրդակցության ժամանակ այս տվյալները քաղաքապետ Տիգրան Ավինյանին ներկայացրեց «Կարեն Դեմիրճյանի անվան Երևանի մետրոպոլիտեն» ՓԲԸ տնօրենի պաշտոնակատար Բաբկեն Սեդրակյանը:
Ավինյանը հետաքրքրվեց` տեխնիկապես ինչ վիճակում է մետրոպոլիտենը, ինչին Սեդրակյանն արձագանքեց.
«Այնքան էլ լավ չի, սպասում ենք` պահեստամասեր ստանանք, որոշ վագոններ կան, որ պետք է վերանորոգենք, սպասում ենք` կառավարության կողմից ֆինանսավորում լինի` անվազույգերի և այլ մասերի»:
Նա տեղեկացրեց, որ մեկ անգամ արդեն ֆինանսների նախարարությունից մերժել են իրենց` այն հիմնավորմամբ, որ ֆինանսական այդ հատկացումը հաջորդ տարվա բյուջեում են նախատեսում: Սեդրակյանը տեղեկացրեց, որ ուրբաթ օրը դիմել են ՏԿԵՆ` հայտնելով, որ դա հրատապ է, չունեն անվազույգեր:
Ավինյանը խոստացավ անձամբ զբաղվել այս հարցով, նաև հետաքրքրվեց` ինչ գնումների կարիք կա:
«32 անվազույգեր, մոտ 200 մլն դրամի պահեստամասեր, իսկ 4 կմ ռելսը ճանապարհին է, գալիս է, ասացին` մեկ ամսվա մեջ կհասնի»,- հայտնեց Սեդրակյանը:
-
-
