Թուրքիայի Դիարբեքիրի շրջանում գտնվող Սուրբ Սարգիս հայկական եկեղեցին կվերականգնվի. civic
Թուրքական իշխանությունները կվերականգնեն Դիարբեքիրի Սուր վարչական շրջանում գտնվող 16-րդ դարի Սուրբ Սարգիս հայկական եկեղեցին:
«Անադոլու» գործակալության հաղորդմամբ, շուրջ 3769 քառ. մետր տարածք զբաղեցնող եկեղեցին տեղի հայ համայնքի բացակայության պատճառով անխնամ է մնացել և ժամանակի ընթացքում քանդվել: Այժմ եկեղեցին բոլորովին առանց տանիքի է մնացել:
Վերջին անգամ այն վերանորոգվել է 1840 թվականին, դրա մասին արձանագրությունը պահպանված է Դիարբեքիրի հնագիտական թանգարանում: Անցած տարի Պոլսո Հայոց պատրիարք Սահակ Մաշալյանն ու նրան ուղեկցող պատվիրակությունը այցելել էր Դիարբեքիրի նահանգապետ Մունիհ Քարալօղլուին և բարձրացրել այս եկեղեցու պահպանության հարցը:
2021-ի դեկտեմբերի վերջին եկեղեցու վերականգնման համար Դիարբեքիրի գեոդեզիայի և հուշարձանների տնօրինության կողմից մրցույթ էր հայտարարվել: Հաղթած ընկերության հետ 947 հազար 640 լիրայի (շուրջ 70 հազար դոլար) պայմանագիր է ստորագրվել: Արդեն սկսվել են չափագրման և եկեղեցու պահպանված հատվածների նյութերի ուսումնասիրման աշխատանքները, որպեսզի հնարավոր լինի վերականգնել կառույցի նախնական տեսքը:
-
-
