Հավայան կղզիների Հալեակալայի աստղադիտարանում կառուցված նոր աստղադիտակը՝ DKIST-ը ( Daniel K. Inouye Solar Telescope ) , որը նախատեսված է Արեգակի ուսումնասիրման համար, սկսել է իր աշխատանքները և կատարել առաջին լուսանկաները։
DKIST-ը գտնվում է Մաուի կղզում ՝ ծովից 3000 մետր բարձրության վրա։ Այն ունի 4 մետրանոց հայելի, ինչը թույլ է տալիս անհավանական բարձր որակի լուսանկարներ կատարել։ Դրա շնորհիվ նոր աստղադիտակը համարվում է Արեգակը ուսումնասիրող ամենահզոր սարքը։ DKIST-ի հզորությունը թույլ է տալիս մաքսիմալ zoom-ի ժամանակ լուսանկարել նույնիսկ 30 կմ չափսով մարմինները և կատարել 40․000 կմ երկարություն ունեցող պանորամային լուսանկարներ։
Նոր սերնդի աստղադիտակի առաջին լուսանկարները հրապարակվել են Ամերիկյան Ազգային Գիտական Ֆոնդում։ Դրանք այնքան բարձր որակի են, որ լուսանկարներում երևում են նույնիսկ « արևային հատիկները » ։ Այդ հատիկները բաղկացած լինելով շիկացած պլազմայից բարձր ջերմություն անջատելիս բարձրանում են վեր՝ իրենց կողքերին առաջացնելով սև հատվածներ։ Արեգակնային հատիկներից յուրաքանչյուրը ունի մոտ 1500 կմ տրամագիծ։ Յուրաքանչյուր պահի արեգակը ծածկված է մոտ 40․000 այդպիսի հատիկներով։
Ըստ DKIST աստղադիտակի գլխավոր տնօրեն Թոմաս Ռիմելի, հելիոֆիզիկները պետք է կարողանան ոչ միայն տեսնել 150 միլիոն կմ հեռավորության վրա գտնվող մեր լուսատուի յուրաքանչյուր մասնիկը, այլ նաև ճիշտ չափել դրա մագնիսական դաշտի ուղղությունն ու հզորությունը, ինչը նոր սարքավորման ուժերի սահմաններում է։
DKIST-ը իր աշխատանքները շարունակելու է Parker Solar Probe և Solar Orbiter ( մեկնարկը մոտ ապագայում ) տիեզերական աստղադիտակների հետ միասին։ Ակնկալվում է, որ այս գերհզոր աստղադիտակը մոտ 50 տարի կշարունակի գիտնականներին տրամադրել թանկարժեք գիտական տվյալներ։