Խորհրդարանը քննարկեց «Զինծառայության և զինծառայողի կարգավիճակի մասին» օրենքի փոփոխությունների նախագիծը, որի հեղինակը ԱԺ «Իմ քայլը» խմբակցության պատգամավոր Սոֆյա Հովսեփյանն է:
Պատգամավորը նախագծով առաջարկում է անվճար բարձրագույն կրթության իրավունք տալ զոհված զինծառայողի ծնողին և ամուսնուն: «Այսօր գործող օրենքով դա չի կարգավորվում, այդ բեռը պետությունն իր վրա չի վերցնում, բուհն իր հայեցողությամբ զեղչեր կա՛մ անում է, կա՛մ՝ ոչ»,- պարզաբանեց նա:
Ս.Հովսեփյանի խոսքով՝ նախագծի ընդունումից հետո պետությունն ամբողջությամբ կարող է տրամադրել օժանդակություն, որպեսզի զոհված զինծառայողի ծնողներն ու այրին ունենան անվճար կրթության հնարավորություն և ապագայում՝ նաև արժանապատիվ աշխատանք:
«Մենք առաջարկել էինք նաև քույրերին և եղբայրներին ներգրավել, սակայն քանի որ նրանց թվի վերաբերյալ ուսումնասիրություն չկա, այս բաղադրիչը ժամանակավորապես հանվել է»,- ընդգծեց պատգամավորը:
Նա նշեց, որ այս պահին բուհերում սովորում է զոհված զինծառայողի 12 հարազատ, որից 5-ը նրանց այրիներն ու ծնողներն են, 7-ը՝ քույր և եղբայրը: Վերջինը, սակայն, ամբողջական թիվը չէ, ուստի այդ հարցն, ըստ նրա, հետագայում կրկին կքննարկվի: