«Հրանտ Դինք» հիմնադրամի կողմից իրականացվող «Ատելության խոսքը մամուլում» նախագծի շրջանակներում կազմվել և հրապարակվել է հերթական զեկույցը՝ հայտնում է Ermenihaber-ը:
Դրանում ներկայացվում է 2019-ին էթնիկ, կրոնական և այլ խմբերի վերաբերյալ թուրքական մամուլում կիրառված՝ ատելություն պարունակող կամ սերմանող խոսքի ծավալները և քանակը:
Զեկույցի համար ուսումնասիրվել է մամուլի 4364 հրապարակում: Դրանցից 108 հրապարակման մեջ առկա է եղել ատելության խոսք՝ ուղղված մեկից ավելի խմբերի դեմ: Նշվում է, որ ընդհանուր առմամբ 80 տարբեր խմբերի վերաբերյալ օգտագործվել է 5515 ատելության խոսք:
Ատելության խոսքի թիրախ դարձած խմբերը ըստ հերթականության հետևյալ տեսքն ունեն.
- Հայեր — 803 ատելության խոսք.
- Սիրիացիներ — 760.
- Հույներ (Հունաստանի) — 754.
- Հրեաներ — 676.
- Հույներ (Թուրքիայի, Կիպրոսի և այլն) — 603.
- Քրիստոնյաներ — 334:
Հայերն ամենաշատը թիրախավորվում են Խոջալուի դեպքերի ու Հայոց ցեղասպանության թեմայով հոդվածներում, որոնցում հաճախ նույնականացվում կամ կապակցվում են «Քուրդիստանի բանվորական կուսակցություն» ռազմաքաղաքական կազմակերպության և ASALA-ի հետ: Հայերը շատ են թշնամացվում նաև Ադրբեջանի հետ ունեցած հակամարտության համատեքստում:
Ընդհանուր առմամբ ատելության խոսքի 51 տոկոսը հրապարակվել է տեղական, իսկ 49 տոկոսը՝ հանրապետական մամուլում:
Հանրապետական նշանակության մամուլի միջոցներից ամենաշատ ատելության խոսքը կիրառել է Yeni Akit ընդգծված ազգայնական թերթը՝ 263 դեպք:
Դրան հաջորդում են Yeniçağ (155 դեպք), Diriliş Postası (131), Milli Gazete (123), Milat (118) թերթերը: