Վրաստանի վարչապետ Գիորգի Գախարիայի խոսքով՝ ընդունվել է որոշում ՝ հոկտեմբերի 16-ից, մայրքաղաքաք Թբիլիսիում և Իմերեթիի շրջանում սահմանափակել ռեստորանների և բոլոր ժամանցի վայրերի աշխատանքը ժամը 22:00-ից: Վարչապետի խոսքով՝ սա հնարավորություն կտա դանդաղեցնել վարակի տարածման արագությունը:
Ինչպես երևում է, առաջիկա օրերին մեր օրական դեպքերի քանակը կանցնի 1000-ի շեմը, և միակ ելքը մասնակի սահմանափակումներն են,- հայտարարել է Գախարիան:
Գախարիան նշել է նաև, որ բոլորն ունեն իրենց բաժին պատասխանատվությունը, և այդ պատասխանատվությունը տարածվում է կառավարության, իշխանության, մասնավոր և պետական կազմակերպությունների վրա:
Հոկտեմբերի 15-ի ժամը 11:00-ի դրությամբ Վրաստանում կորոնավիրուսով վարակի 919 նոր դեպք է գրանցվել: Ընդհանուր դեպքերի քանակը երկրում 14.440 է: Այս մասին գրում է կառավարության ստեղծած stopcov.ge կայքը: