Արդյունաբերական դիզայնի ֆակուլտետի ուսանող, հարավկորեացի Մինուկ Փենգը ռոբոտային աչք է ստեղծել բոլոր այն մարդկանց համար, որոնք չեն կարողանում ապրել առանց սոցիալական ցանցերի, գրում է Luxury Launches-ը:
Third Eye («Երրորդ աչք») հայտնագործությունն իր տեսակի մեջ նորարարություն է: Ռոբոտային սարքավորումը, որն ամրացվում է ճակատին, հեշտությամբ «որսում է» բոլոր խոչընդոտներն այն ընթացքում, երբ սմարթֆոնի օգտատերը քայլելիս չի նայում դիմացն ու զբաղված է սոցիալական ցանցերով:
Ճանապարհին որևէ խոչընդոտ նկատելու դեպքում «Երրորդ աչք»-ը թրթռման միջոցով անմիջապես այդ մասին տեղեկացնում է իր «տիրոջը»:
Սարքավորումը կազմված է կիսաթափանցիկ պլաստիկե մարմնից, իսկ ճակատին ամրացվում է բարակ և կպչուն գելային բարձիկի միջոցով:
Ռոբոտային աչքը հագեցած է բարձրախոսով և գիրոսկոպով: Վերջինս սենսոր է, որն օգտագործվում է սմարթֆոններում՝ դրա էկրանը ավտոմատ կերպով պտտելու կամ լուսավորումն անջատելու և միացնելու համար: Հենց այս սենսորն է կարողանում հայտնաբերել ճանապարհին առկա խոչընդոտները, երբ օգտատիրոջ «հայացքն ընկղմված է հեռախոսի մեջ»:
ittrend.am