Ադրբեջանի շրջանային դատարանում շարունակվել է գերեվարված լիբանանահայ Վիգեն Էուլջեկչյանի դատավարությունը: Բաքուն նրան մեղադրում է ահաբեկչական գործողությունների համար: Վիգեն Էուլջեկչյանը խնդրել է արդարացնող վճիռ կայացնել։ Վճիռը կհրապարակվի հունիսի 14-ին։ Ավելի վաղ Ադրբեջանի դատախազը պահանջել էր 20 տարի ազատազրկում: Հունիսի սկզբին Ադրբեջանը կեղծ քրեական գործերով դատական գործընթացներ է սկսել նաև գերեվարված երկու անձի՝ Լյուդվիգ Մկրտչյանի և Ալյոշա Խոսրովյանի դեմ: Իսկ այսօր Բաքուն հրապարակել է 26 հայ ռազմագերու անուն՝ նրանց ներկայացնելով դիվերսանտներ, շինծու գործերն ուղարկել վարույթ՝ քննության համար:
Լիպարիտ Դրմեյան (ՄԻԵԴ-ում Հայաստանի ներկայացուցչի գրասենյակի ղեկավար) — Այդ անձանց վերաբերյալ քրեական գործեր հարուցված լինելու մասին ՄԻԵԴ-ի խողովակով մենք չենք տեղեկացվել: Այս փուլի, նաև դրան նախորդող հաղորդագրություններ, որ պաշտոնապես տարածել է Ադրբեջանը՝ Խծաբերդի խմբի տղաների մասին է ըստ էության խոսքը, մենք, ինչպես և հանրությունը տեղեկանում ենք ադրբեջանական մամուլի հաղորդագրություններից: Բոլոր միջանկյալ միջոցներն այս պահին գտնվում են ուժի մեջ: Ցանկացած փոփոխություն, որ այդ անձանց հետ կապված լինում է Ադրբեջանում, և մենք տեղեկանում ենք այդ փաստի վերաբերյալ, անմիջապես ծանուցում ենք ՄԻԵԴ-ին: