Այսուհետ COVID-19-ի դեմ պատվաստվելու համար պատվաստումային շրջիկ կայաններում երկար սպասելու կարիք չի լինի։
Առողջապահության նախարարությունը պատվաստման գործընթացն առավել հարմարավետ ու դյուրին դարձնելու համար ներդրել է հերթերի կառավարման էլեկտրոնային համակարգ, որի նպատակն անհարկի կուտակումները բացառելն է և գոյացած հերթերը կանոնակարգելը։
Առողջապահության նախարարի ժամանակավոր պաշտոնակատար Անահիտ Ավանեսյանն այսօր այցելել է Հյուսիսային պողոտա 1 հասցեում գտնվող պատվաստումային կայան, ծանոթացել հերթերի կարգավորման նոր համակարգի գործարկմանն ու դրա շնորհիվ կարգավորվող պատվաստման ընթացքին։
Նշենք, որ էլեկտրոնային գրանցման համակարգը ներառում է 3 բաժին՝
• ՀՀ քաղաքացիություն ունեցող անձինք.
• քաղաքացիություն չունեցող անձինք.
• կացության իրավունք ունեցող անձինք:
Համակարգը նախատեսում է ինչպես պատվաստումային գործընթացի իրականացում, այնպես էլ խորհրդատվություն:
Հաշվի առնելով, որ COVID-19-ի դեմ պատվաստվել ցանկացողների թիվը գնալով մեծանում է, առողջապահության նախարարությունը շարունակելու է պատվաստման գործընթացը մարդկանց համար առավել հասանելի, պարզ և վստահելի դարձնելու ամենօրյա աշխատանքները։