Ադրբեջանն օրերս Հայաստան վերադարձրեց ևս մեկ գերեվարվածի՝ պայմանագրային զինծառայող Արթուր Դավիդյանին։ Նշենք, որ զինծառայողն անհետացել էր օգոստոսի 22-ին՝ Սև Լճի հատվածից, սակայն նրա գերեվարված լինելու փաստը Ադրբեջանն այդպես էլ չէր հաստատել։
Արթուր Դավիդյանի կինը՝ Հասմիկ Աբգարյանը, Civic.am-ի հետ զրույցում նշեց, որ ամուսինը առողջական տեսանկյունից Հայաստան է վերադարձել նորմալ վիճակում և արդեն հանդիպել է երեխաներին, որոնք տեղյակ էին իրենց հոր անհետացումից։ Հայրիկն արդեն տանն է։
«Արտաքին տեսքը նորմալ է, ամեն ինչ նորմալ է իր հետ։ Համոզված եմ, որ մյուս բոլոր գերիներին բերելու համար էլ կառավարությունը ջանքեր գործադրում է։ Համացանցում տարածվել էր տեղեկատվություն, թե իմ ամուսնուն Ադրբեջանը վերադարձրել է, որովհետև Հայաստանը թույլատրել էր, որ ադրբեջանական օդանավն իր տարածքով անցնի, բայց դա սուտ է, մենք նման տեղեկատվություն չունենք։ Ես իմ ամուսնու գալու մասին իմացա, երբ ԱԺ-ում այդ մասին հայտարարվեց»,- ասաց Արթուր Դավիդյանի կինն ու հավելեց, որ շնորհակալ է ՀՀ կառավարությունից, պաշտպանության նախարարությունից ու ԱԱԾ-ից իր ամուսնուն հայրենիք վերադարձնելու նպատակով գործադրած ջանքերի համար։
Նշենք, որ հոկտեմբերի 6-ին ԱԺ-կառավարություն հարցուպատասխանի ժամանակ փոխվարչապետ Սուրեն Պապիկյանը հայտարարեց, որ Ադրբեջանը ևս մեկ գերի է վերադարձնում Հայաստան՝ Արթուր Դավիդյանին։ Այդ նույն օրը Ադրբեջանը տեղեկություն էր տարածել, որ Բաքու-Նախիջևան օդային կապն այլևս իրականացվում է Հայաստանի տարածքով:
Հիշեցնենք, որ ըստ ՊՆ հաղորդագրության՝ օգոստոսի 22-ին մառախուղի պատճառով Սև լճի տարածքից մոլորվել էր զինծառայող Արթուր Դավիդյանը։ Եվ Ադրբեջանը թեպետ չէր հաստատում նրա գերեվարված լինելու փաստը, այնուամենայնիվ զինծառայողի կինը՝ Հասմիկ Աբգարյանը, ահազանգել էր Civic.am-ի խմբագրություն և համոզմունք հայտնել, որ ՀՀ տարածքից ադրբեջանցի զինծառայողներն առևանգել են Արթուր Դավիդյանին։
Նարա Մարտիրոսյան