Ուկրաինայի սահմանապահ ծառայության ղեկավար Սերգեյ Դեյնեկոն կարգադրել է փետրվարի 20-ից սահմանափակել 18-45 տարեկան տղամարդկանց ելքը երկրից։ Այս մասին հինգշաբթի օրը կայացած ճեպազրույցում հայտարարել է Դոնեցկի Ժողովրդական Հանրապետության ժողովրդական միլիցիայի վարչության պետի տեղակալ Էդուարդ Բասուրինը։
«Ըստ մեր գաղտնի հետախուզության տվյալների՝ փետրվարի 2-ին Ուկրաինայի պետական սահմանային ծառայության ղեկավար Դեյնեկոն հրահանգ է տվել փետրվարի 20-ից սահմանափակել 18-45 տարեկան տղամարդկանց մեկնումը երկրից։ Միաժամանակ, խուսափելու համար բնակչության շրջանում խուճապից՝ որպես երկրից մեկնելը սահմանափակելու պատճառ է նշվել տվյալների բազայում տրված վիզաների մասին տեղեկատվության բացակայությունը, վարչական իրավախախտումների վերաբերյալ ենթադրյալ գործերի առկայությունը, ալիմենտ չվճարելը կամ գույքային չլուծված վեճերը և այլ պատճառներ»,- նշել է նա:
Դոնեցկի ժողովրդական միլիցիայի ներկայացուցչի խոսքով՝ Կիևն արդեն պատրաստ է «զենքի տակ» դնել ողջ երկիրը՝ Դոնբասում իր պատժիչ ծրագրերին հասնելու համար։
«Ինչպես գիտեք, փետրվարի 1-ին Ուկրաինայի նախագահ Վլադիմիր Զելենսկին հրամանագիր է ստորագրել Ուկրաինայի զինված ուժերը ևս 100.000 հոգով ավելացնելու և լրացուցիչ 20 բրիգադ ստեղծելու մասին: Իհարկե, դրանց համալրումը պահանջում է զգալի մարդկային ռեսուրսներ»,- ասել է Բասուրինը։
Դոնեցկի ժողովրդական միլիցիան նաև տեղեկություններ ունի, որ Ուկրաինայի ԱԳՆ-ն երրորդ երկրների դիվանագիտական ներկայացուցչություններին խնդրում է գաղտնի տեղեկացնել իրենց քաղաքացիներին Դոնբասից հեռանալու անհրաժեշտության մասին, պնդել է Բասուրինը։
Նա հավելել է, որ Ուկրաինան նաև մի շարք նոր սահմանափակումներ է մտցրել այն օտարերկրացիների համար, որոնք չունեն երկիր այցելելու «հիմնավոր պատճառներ»: «Բացի այդ, ուկրաինական սահմանին մի շարք նոր սահմանափակումներ են մտցվել օտարերկրացիների մուտքի համար, որոնք չունեն Ուկրաինա այցելելու հիմնավոր պատճառներ»,- ասել է նա։
Նրա խոսքով՝ Ուկրաինայի ԱԳՆ-ն նոտաներ է պատրաստում երրորդ երկրների դեսպանատներին, «որոնցում Կիևը օգնություն է խնդրում զորակոչի տարիքի Ուկրաինայի քաղաքացիներին երկրի տարածք վերադարձնելու հարցում»։