ՀՀ փոխոստիկանապետ Վարդան Մովսիսյանը, այսօր Ազգային ժողովում լրագրողների հետ ճեպազրույցում անդրադառնալով ոստիկանության ներկայացուցիչներին տրված պարգևավճարներին, նշեց, որ դա օրենքին համապատասխան գործողություն է:
«Պարգևավճարի հետ միասին ոստիկանի միջին աշխատավարձը կազմում է 215 հազար դրամ: Դա աշխատանքային գործընթաց է, տարվա մեջ կարող են լինել պարգևատրումներ: Ոստիկանները պարգևատրվել են մայիսին, մոտ 2,5 միլիարդ դրամի չափով, պարգևատրվել են ՀՀ ոստիկանության բոլոր աշխատակիցները»,- հայտնեց նա:
Անդրադառնալով այն խոսակցություններին, որ մարզերից այս օրերին ոստիկաններ են բերվում մայրաքաղաք՝ փոխոստիկանապետն ասաց՝ դա արվում է հասարակական կարգը պահելու համար, քանի որ Երևանում ցույցեր են ընթանում:
Դիտարկմանը՝ ոստիկանները անհամաչափ ուժ են կիրառում, նույնիսկ անչափահասների նկատմամբ, Մովսիսյանը նշեց՝ դա իրենք (ընդդիմադիրները) են ասում, թե բիրտ ուժ է. «Ոստիկանները մարդկանց բերման են ենթարկում: Իսկ անչափահասների մասով մի հարց տամ. ի՞նչ գործ ունի այնտեղ անչափահասը: Անչափահասին, ում տեղափոխել էին հիվանդանոց, ոչ մի լուրջ բան չի եղել, ես անձամբ եմ հետաքրքրվել, հիվանդանոցում առաջին օգնություն է ցուցաբերվել: 6 ոստիկան է տեղափոխվել հիվանդանոց և 5 քաղաքացի: Ոստիկաններից մեկի մոտ կա կողերի կոտրվածք»: