ԱՄՆ-ն շարունակում է ռազմական օգնություն տրամադրել Ադրբեջանին։ Այս մասին օրերս հրապարակել էր ԱՄՆ Հայ դատի հանձնախումբը և նշել, որ ԱՄՆ նախագահ Ջո Բայդենը շրջանցել է 907-րդ բանաձևը, որով ԱՄՆ-ի կառավարությանն արգելվում է Ադրբեջանին ռազմական օգնություն տրամադրել։ Իսկ միջազգայնագետ Սուրեն Սարգսյանը Ֆեյսբուքի իր էջում գրել էր, որ 2002թ․-ից ի վեր ԱՄՆ նախագահները շրջանցում են Ադրբեջանին ռազմամթերք տրամադրելն արգելող օրենքն ու ռազմական օգնություն տրամադրում Ադրբեջանին։
Civic.am-ը թեմայի վերաբերյալ հարցեր է ուղղել Հայաստանում ԱՄՆ դեսպանությանը։
Խնդրում եմ նշել՝ արդյոք ԱՄՆ-ն ունի՞ փաստեր, որ 44-օրյա արցախյան պատերազմի ժամանակ Ադրբեջանը չի կիրառել այն ռազմամթերքը, որը տրամադրվել է ԱՄՆ-ի կողմից և որոնք են այդ փաստերը։
Մանրակրկիտ դիտարկելով ԱՄՆ ազգային անվտանգության շահերը և առաջնահերթությունները տարածաշրջանում՝ Կառավարման և ռեսուրսների գծով պետքարտուղարի առաջին տեղակալը երկարաձգել է «Ազատության աջակցման ակտի» 907-րդ բանաձևի շրջանցման դրույթի ժամկետը։ Սա գործողության մեջ է մտել հունիսի 22-ին։
Անվտանգության ոլորտում Ադրբեջանին ուղղվող ողջ աջակցությունը ապահովվում է հիմնարար մոտեցմամբ, որ դա հարձակողական նպատակներով չօգտագործվի Հայաստանի դեմ և որևէ կերպ չխաթարի Լեռնային Ղարաբաղի հակամարտության տևական քաղաքական կարգավորման շուրջ ընթացող բանակցային ջանքերը։
Արդյոք կա՞ն փաստեր, որ ռազմամթերքը նպատակային է օգտագործվում Ադրբեջանի կողմից և որո՞նք են այդ փաստերը։
ԱՄՆ կառավարությունը շարունակաբար վերանայում և մշտադիտարկում է ԱՄՆ արտաքին աջակցությունը բոլոր երկրներին, այդ թվում՝ Հայաստանին և Ադրբեջանին՝ երաշխավորելու միջոցների պատշաճ տնօրինումն ու համահունչ լինելը ԱՄՆ արտաքին քաղաքականության նպատակներին։
Շարունակությունը կարդացեք սկզբնաղբյուրում. civic.am
Նարա Մարտիրոսյան