«Արարատցեմենտ»-ի աշխատակիցները պնդում են, որ «Մուլտի Գրուպ»-ի տնօրենը հայհոյել է իրենց. բողոքի ակցիա. Հայկական ժամանակ
Արարատի ցեմենտի գործարանում այսօր առավոտյան լարված իրավիճակ էր. շուրջ 100 աշխատակիցներ փակել էին գործարանի մուտքը՝ պահանջելով, որ գործարանի կառավարիչ, «Մուլտի Գրուպ» կոնցեռնի գործադիր տնօրեն Սեդրակ Առուստամյանը հրաժարվի գործարանի կառավարումից:
Բացի այդ, պահանջում էին նաեւ, որ Առուստամյանը ներողություն խնդրի աշխատակիցներից:
Նշենք, որ կոնցեռնի սեփականատերը ԱԺ ԲՀԿ խմբակցության ղեկավար Գագիկ Ծառուկյանն է:
Գործարանի աշխատակիցներից Հենրիկ Խեչումյանը «Հայկական ժամանակ»-ի հետ զրույցում պատմել է, որ 2 ամիս է՝ գործարանի աշխատակիցներին քիչ աշխատավարձ է վճարվել, եւ երեկ նրանք գնացել են գործարանի տնօրեն Սամվել Թադեւոսյանից պարզաբանում ստանալու. «Հանգիստ նստած խոսել են տնօրենի, տեղակալի, արտադրամասի պետերի հետ, այդ պահին այնտեղ է մտել «Մուլտի Գրուպ» կոնցեռնի գործադիր տնօրեն Սեդրակ Առուստամյանը եւ ցանկացել ծանոթանալ խնդրին, դրան ծանոթանալուց հետո Առուստամյանն ասաց՝ ով ուզում է, թող աշխատի, ով չի ուզում… ու այդտեղ սեռական բնույթի հայհոյանք է տալիս: Աշխատակիցները նույն կերպ պատասխանել են իրեն եւ դուրս եկել»:
Գործարանի աշխատակիցն ասաց, որ այդ պատճառով այսօր փակել են գործարանի մուտքը, որպեսզի Սեդրակ Առուստամյանը գնա այնտեղ, ներողություն խնդրի իրենցից եւ հրաժարվի «Արարատցեմենտ»-ի կառավարումից:
Լրատվականի հարցին՝ ինչպես են պատկերացնում, որ գործարանը կառավարող ընկերության սեփականատերը հրաժարվի դրա կառավարումից, Խեչումյանը պատասխանեց. «Չենք ասում՝ սեփականատերը հանձնի պետությանը, թող ուրիշ մարդ կառավարի, եւ թող կառավարի գործարանի ներկայիս տնօրենը»:
Նրա խոսքով՝ գործարանի մուտքը փակելուց Սեդրակ Առուստամյանն այցելել է այնտեղ եւ կատարել իրենց պահանջները. «Նա ներողություն է խնդրել եւ արդեն փաստաթուղթ է ստորագրել, որով հրաժարվում է գործարանի կառավարումից՝ այն թողնելով «Արարատցեմենտի» տնօրենի կառավարմանը»:
-
-
