Գյումրու ավագանին 20 մլն դրամ հատկացրեց «Հայաստան համահայկական հիմնադրամին»

Գյումրու ավագանու այսօրվա նիստը սկսվեց խոնարհումի և մեկ րոպե լռությամբ Արցախում նահատակված քաջերի հիշատակը հարգելու արարողությամբ:

Ավագանու օրակարգային հարցերի թվում առաջնային էր «Մենք ենք, մեր սահմանները, բոլորս Արցախի համար» համազգային դրամահավաքին միանալու հարցը:

x

Ավագանու միաձայն որոշմամբ, «Հայաստան համահայկական հիմնադրամ»-ին 20 մլն դրամ կփոխանցվի: 10 մլն դրամն Արցախի կարիքներին, 10 մլն դրամը՝ անպայման Շուշիի սուրբ Ղազանչեցոց եկեղեցու վերականգնմանը կուղղի Գյումրին:

«Սկզբում 10 մլն էինք նախատեսել, հետո որ եկեղեցու ավերումը եղավ, ևս 10 մլն ավելացրեցինք: Հիմա անպայման մենք այնպես ենք անելու, որ էդ 20 մլն-ից 10 միլիոնը գնա հենց եկեղեցուն: Հիմնադրամի հետ կխորհրդակցենք, կհասկանանք, թե ինչպես ենք այդ գումարը փոխանցելու: Եթե պետք է, Շուշիի քաղաքապետարանին կփոխանցենք, եթե ասեն՝ հիմնադրամին, ուրեմն հիմնադրամին կփոխանցենք»,- հստակեցրեց քաղաքապետ Սամվել Բալասանյանը:

Եվս 50 մլն դրամ հիմնադրամին փոխանցել է «Գյումրի գարեջուր»-ը: Բալասանյանն ասաց՝ այս օրերին, երբ կենաց ու մահի կռիվ է մղվում, շատ գյումրեցիներ են առանց բարձրաձայնումների մեծ գումարներ փոխանցել: Դա բոլորի պարտքն է: «Բայց ես մեկ անգամ ևս բոլորիդ հորոդորում եմ, որ թեկուզ 1000 դրամ փոխանցումներ անեք հիմնադրամին, մեր դիրքերին: Սրանով յուրաքանչյուրրդ մասնակից եք դառնում հսկայական գործին, որ արվում է: Ձեր շրջապատում էլ բոլորին կոչ արեք: Բոլորին: Ուղղակի խնդրում եմ»,- ասաց Բալասանյանը:

armtimes.com