Թբիլիսիում իրավիճակն անհանգիստ էր մինչև ուշ գիշեր
Երեկ մինչև ուշ ժամի անհանգիստ է եղել իրավիճակը Թբիլիսիում, գրում է Aliq-ը: Ի պատասխան ծայրահեղականների գործողությունների, որոնք խափանեցին ԼԳԲՏ անձանց իրավունքների պաշտպանությանը նվիրված «Արժանապատվության երթը», մայրաքաղաքի կենտրոնական Ռուսաթավելու պողոտայում, խորհրդարանի հարակից տարածքում անցկացվել է «Լուռ ակցիա»:
Մասնակիցներն իրենց աջակցությունն են հայտնել ծայրահեղականների հարձակումներից տուժածներին, խորհրդարանի շենքի վրա բարձրացրել են Եվրամիության դրոշը: Ակցիան խաղաղ չի անցել, ոստիկանները ստիպված են եղել պատնեշներ ստեղծել ծայրահեղականների հարձակումներից խաղաղ ցուցարարներին պաշտպանելու համար: Նրանց ուղղությամբ շշեր, քարեր, ձվեր, փայտիկներ ու հրավառ նյութեր են նետել, խորհրդարանի շենքի հետնամասում հարձակման են ենթարկվել ԼԳԲՏ որոշ ներկայացուցիչներ:
«Լուռ ակցիայի» ավարտից հետո են միայն հեռացվել արգելապատնեշները, և ծայրահեղականներին հաջողվել է հասնել խորհրդարան, իջեցնել ԵՄ դրոշն ու այրել այն:
